მიმდინარე მსოფლიო ჩემპიონატის მთავარი აღმოჩენა უდავოდ არის კაპო ვერდეს ნაკრები, რომელმაც მუნდიალის პლეიოფში გააღწია. ეს ყველაფერი იმის გათვალისწინებით, რომ აფრიკელებმა ჯგუფური ეტაპი ჩაამთავრეს წაუგებლად, თანაც ესპანეთთან, ურუგვაისა და საუდის არაბეთთან ბრძოლაში.
დიახ, "ზვიგენები" არ დამარცხებულან მსოფლიოს ორ ჩემპიონ ნაკრებთან და "სელესტე" მათ საერთოდ ჯგუფშიც ჩატოვეს. მუნდიალის ერთ-ერთი ყველაზე მოკრძალებული ეროვნული გუნდი შესაძლოა ყოფილიყო ბევრად მასშტაბური, კაპო ვერდული წარმომავლობის მქონე ვარსკვლავებს აღნიშნულ ნაკრებში რომ ეთამაშათ.
ამ აფრიკული ქვეყნის წარმომავლობის მქონე ფეხბურთელები ჭარბობენ პორტუგალიაში, ვინაიდან და რადგანაც ეს ტერიტორია სწორედ პირენეელთა კოლონია იყო. მოთამაშეებს შორის პირველ რიგში გამოსარჩევია კრიშტიანუ რონალდუ, რომლის დიდი ბებია მამის მხრიდან კაპო ვერდედან იყო.
აფრიკელი გოგონა პორტუგალიელი თავდამსხმელისთვის მშობლიურ მადეირაზე 16 წლის ასაკში გადაბარგდა. მსგავსი წარმომავლობა აქვს ლუიშ ნანისაც, ახლა კი უბრალოდ წარმოიდგინეთ, 2000-იანების ინგლისის ჩემპიონატის 2 მთავარი ვინგერი "ზვიგენების" რიგებში. რაც შეეხება "ლუზიტანთა" თანამედროვე ვარსკვლავებს: ნელსონ სემედუ, ნუნუ მენდეში და რენატო ვეიგა.
ეს არის კაპო ვერდული წარმომავლობის მქონე პორტუგალიელი ფეხბურთელების არასრული ჩამონათვალი. მსგავსი ტენდენცია გვხვდება საფრანგეთშიც, ყველაზე ცნობილი წარმომადგენლები პატრიკ ვიეირა და პატრის ევრა არიან. ორივე მათგანი დაიბადა სენეგალში, მაგრამ მათი წინაპრები კაპო ვერდედან იყვნენ.
ვიეირა ზოგადადაც პორტუგალიური გვარია, არსებობს მოსაზრება, რომ ევრაც, რომელიც ევორადან წარმოიშვა. ამ აფრიკული ქვეყნის წარმომადგენლებმა მიაღწიეს ჩრდილოეთ ევროპამდეც, უფრო კონკრეტულად კი შვედეთამდე, სახელმწიფომდე, რომელმაც საფეხბურთო სამყაროს ჰენრიკ ლარსონი აჩუქა.
ბარსელონას ყოფილი თავდამსხმელი კაპო ვერდელია მამის მხრიდან, მისი გვარია და როშა, თუმცა შვილმა დედის გვარი აიღო. მშობლებმა ჩათვალეს, შვედური გვარით ახალგაზრდა მოთამაშეს უფრო გაუმარტივდებოდა სკანდინავიაში წარმატების მიღწევა.
