ევროპა ლიგის მესამე საკვალიფიკაციო ეტაპზე საქართველოს მოქმედი ჩემპიონი იბერია სტუმრად ჩრდ.ირლანდიურ ლარნეს დაუპირისპირდება. მატჩი ხვალ, 23 საათზეა ჩანიშნული.
როგორც ინფორმაცია გავრცელდა, იბერიას სავიზო პრობლემები შეექმნა, რის გამოც კლუბი ჩრდ.ირლანდიაში გაფრენას კვლავაც ვერ ახერხებს.
La Gazzetta Georgia-სთან საუბარში კლუბის წარმომადგენლებმა იბერიას ამჟამინდელ მდგომარეობაზე ახალი ინფორმაცია მოგვაწოდეს.
როგორც გვითხრეს, ვიზაზე მოთხოვნა დაჩქარებული წესით იქნა შეტანილი, რომელიც დღეს უნდა დადასტურებულიყო, თუმცა არც ხელმძღვანელობას და არც ფეხბურთელებს ვიზა ჯერაც არ მიუღიათ.
ამასთან ერთად, იმ ჩარტერული რეისის ბორტს, რომელიც იბერიამ დაიქირავა და თანხა უკვე გადაიხადა, ჩრდ.ირლანდიის აეროპორტი დაჯდომის საშუალებას არ აძლევს და ცდილობენ, სხვა ბორტით ჩაფრინდნენ.
საქმეში ჩართულია ფეხბურთის ფედერაცია და მისი პრეზიდენტი ლევან კობიაშვილი, რომელიც სიტუაციის მოგვარებას ცდილობს. ამჟამინდელი მდგომარეობით, კლუბის მიზანია, რომ იბერია ბრიტანეთში ამ ღამეს ჩაფრინდეს.
ჩვენივე ინფორამციით, იბერიამ მატჩისწინა ვარჯიში დღეს დილით, თბილისში ჩაატარა, ფეხბურთელები კი ამჟამად სასტუმროში იმყოფებიან და სიტუაციის განახლებას ელოდებიან.
განახლებული ინფორმაცია: იბერიას ფეხბურთელებმა ბრიტანეთის ვიზა მიიღეს და უახლოეს საათებში ჩრდ.ირლანდიაში გაფრინდებიან.
