საქართველოს 20-წლამდელთა მორაგბეთა ნაკრებმა მსოფლიო ჩემპიონატი თბილისში, „ავჭალის“ სტადიონზე უელსის წინააღმდეგ შეხვედრით გახსნა. დაძაბულ და სანახაობრივ მატჩში ქართველები მინიმალური ანგარიშით, 24:25 დამარცხდნენ.
შეხვედრის სტარტი უკეთ სტუმრებს გამოუვიდათ, რომლებმაც პირველ 16 წუთში ორი ლელოს დადება შეძლეს. საქართველოს ნაკრები ნელ-ნელა თამაშში დაბრუნდა და მიხეილ შიოშვილის ლელოთი ჩამორჩენა შეამცირა. მოგვიანებით უელსელებმა საჯარიმო დარტყმა ზუსტად შეასრულეს, თუმცა ტაიმის დასრულებამდე შიოშვილმა მეორე ლელოც მიითვალა, ხოლო ნიკოლოზ ხალვაშმა გარდასახვა გამოიყენა. შედეგად, პირველი ნახევარი უელსის გამარჯვებით, 15:12 დასრულდა.
მეორე ტაიმის დასაწყისში უელსის ნაკრები 10 წუთით კაცნაკლული დარჩა, რაც ქართველებმა მალევე გამოიყენეს – გაბრიელ რაზმაძემ ლელო დადო და საქართველო 17:15 დაწინაურდა. მიუხედავად რიცხობრივი უპირატესობისა, მეტოქემ სწრაფად მოახერხა თამაშში დაბრუნება, კიდევ ერთი ლელო გაიტანა და ზუსტი საჯარიმოც დაამატა, რის შედეგადაც ანგარიში 25:17 გახდა. მატჩის მიწურულს საქართველომ სხვაობის შემცირება შეძლო, თუმცა საბოლოოდ გამარჯვების მოპოვება ვერ მოახერხა და მსოფლიო ჩემპიონატი მარცხით დაიწყო.
საქართველოს 20-წლამდელთა ნაკრები მომდევნო შეხვედრას 2 ივლისს გამართავს. ქართველი მორაგბეები მოქმედ მსოფლიო ჩემპიონს, სამხრეთ აფრიკას დაუპირისპირდებიან. მატჩი 20:30 საათზე დაიწყება.
![[VIDEO] პეპს უფრო და უფრო ემსგავსება - მარესკამ გუარდიოლასგან კიდევ ერთი თვისება აიღო](/_next/image?url=https%3A%2F%2Fge-gz-uploads-471112570717-eu-central-1-an.s3.eu-central-1.amazonaws.com%2Fuploads%2Fposts%2FUXKewH8qSoOsPv8uyjZZEsG9OoCHiwgY.png&w=3840&q=75)
