იაგელონიასთან გასამართო ევროპა ლიგის მატჩის წინ კომენტარი იბერიას მთავარმა მწვრთნელმა ანდრი დემჩენკომ გააკეთა.
"მნიშვნელოვანია, რომ რეაბილიტაცია მოვახდინოთ. ნახავდით, რომ ცუდად ნამდვილად არ გვითამაშია და ამხელა ანგარიშით წაგებას არ ვიმსახურებდით. გუნდის მიზანია, რომ ჩვენი ქომაგების წინ შეცდომები გამოვასწოროთ. ფეხბურთში სენსაციები არსებობს და უნდა გვჯეროდეს, რომ ეს შეგვიძლია.
ჩვენს წინააღმდეგ კონტროვერსიული ეპიზოდი იყო, მაგრამ უნდა აღვნიშნო, რომ ის თამაში, რომელიც 20-25 წუთის განმავლობაში ვაჩვენეთ, 90 წუთი ვეღარ გავაგრძელეთ. თვითკრიტიკაც აუცულებელია. პირველ რიგში, ჩვენი ბრალია, რომ ასეთი დიდი ანგარიშით წავაგეთ.
სამწუხაროდ, ხვალ ბართიშვილი და ბედოშვილი ვერ ითამაშებენ. ანდრია ტრავმირებულია და რეაბილიტაციას გადის. ვახო მზად ლარნესთან მატჩშიც არ იყო, მაგრამ გავრისკეთ, რაც შემდეგ ეტაპზე გასვლაში დაგვეხმარა, თუმცა ფეხბურთელს დაზიანება გაუღიზიანდა.
ჯინჯოლავა შემტევი ფეხბურთელია, წარსულში წინ თამაშობდა და არაერთი გოლიც გაჰქონდა. თუმცა იმ სისტემაში, რომელიც ახლა გვაქვს, ის უფრო შეზღუდულია.
სავარჯიშო სესიების დროს სტანდარტულებზე ვმუშაობთ და გარკვეული კომბინაციები გვაქვს. ეს ყოველთვის ეფექტური არ არის, მაგრამ ამასაც გავაუმჯობესებთ.
ბევრ კლუბში მიმუშავია, მათ შორის - საქართველოში, აზებრაიჯანსა და ყაზახეთში, და შემიძლია ვთქვა, რომ იბერია ჩემს ხელში ყველაზე სწრაფად განვითარდა. ჩემს ხედვასთან 60%-ით ახლოს ვართ, მაგრამ გაუმჯობესება გვმართებს.
ძალიან ბევრ ფეხბურთელს გვთავაზობენ. კლუბი ტრანსფერებზე მუშაობს. ვიცი, რა ტიპის მოთამაშეების მოყვანა მსურს. ფინანსებიც დიდ როლს თამაშობს. თუ ლეგიონერი ჩამოგყავს, ის ქართველზე უფრო მაღალი დონის უნდა იყოს, წინააღმდეგ შემთხვევაში ტრანსფერს აზრი არ აქვს", - განაცხადა დემჩენკომ.
