იაგელონიასთან გასამართო ევროპა ლიგის მატჩის წინ კომენტარი იბერიას ერთ-ერთმა ლიდერმა ზვიად ნაჭყებიამ გააკეთა.
"სრული დატვირთვით ვვარჯიშობთ. ხვალ მოედანზე მოვალეობის მოხდის მიზნით არ გავალთ და ჩვენი მიზანი ევროპა ლიგაზე გასვლაა. 4-0 დიდი ანგარიშია, მაგრამ ფეხბურთში მსგავსი სხვაობის აღმოფხვრის შემთხვევები არსებობს.
იაგელონია რთული მეტოქეა. არ ვფიქრობ, რომ ეს ანგარიში გუნდებს შორის სხვაობას ასახავდა, მაგრამ ფიზიკაში გვაჯობეს.
ჯინჯოლავას სიტყვებმა ქომაგების გაბრაზება გამოიწვია, თუმცა ჩვენც ფეხბურთელები ვართ და რაღაცები ჩვენზეც მოქმედებს. გთხოვთ, ესეც გაითვალისწინოთ.
მსაჯებმა ჩვენს წინააღმდეგ შეცდომები დაუშვეს. მიზეზების ძებნა არ მინდა, მაგრამ ეს სამართლიანი არ იყო. ხვალ ყველაფერს გავაკეთებთ, რომ მატჩი შემოვატრიალოთ. შეუძლებელია არაფერია", - განაცხადა ნაჭყებიამ.
შეგახსენებთ, რომ ევროპა ლიგის მესამე საკვალიფიკაციო ეტაპის მატჩი იბერიასა და იაგელონიას შორის ხვალ, 20 საათზე დაიწყება.
