ცნობილია მსოფლიო რაგბის ახალგაზრდული ჩემპიონატისთვის საქართველოს ნაკრების შემადგენლობა

უმცროსი ბორჯღალოსნების სამწვრთნელო შტაბმა, 2026 წლის მსოფლიო რაგბის ახალგაზრდული ჩემპიონატისთვის 30-კაციანი სატურნირო რაზმი დაასახელა.

ახალგაზრდულ ჩემპიონატზე, რომელზეც საქართველო 2016 წლის შემდეგ ზედიზედ მერვედ თამაშობს (2020-2022 წლებში ის კოვიდ-პანდემიის გამო არ შედგა), ჩვენი გუნდი 17 მორკინალით და 13 ხაზის მოთამაშით წარსდგება და აქამდე ჩატარებულ ტურნირებს შორის საუკეთესო შედეგის ჩვენებას ეცდება.

განვლილი ჩემპიონატებიდან უმცროსი ბორჯღალოსნების საუკეთესო შედეგი მე-8 ადგილი (2023 წელს) იყო, სამ-სამჯერ კი მე-9 და მე-10 ადგილს დასჯერდა.

სატურნირო შემადგენლობაში მყოფი 30 მოთამაშიდან 12, ლეგიონერია და ისინი ფრანგული ტოპ 14-ისა და პრო დე2-ის კლუბებს წარმოადგენენ. 18 მორაგბე 7 ქართულ კლუბზე ნაწილდება - 6 თბილისის ‘ლელოდანაა’, სამ-სამი ქუთაისის ‘აიადან’ და თბილისის ‘არმიადან’, ორ-ორი რუსთავის ‘ხარებიდან’ და თბილისის ‘ხვამლიდან’, ხოლო თითო-თითო თბილისის ‘ლოკომოტივიდან’ და ფოთის ‘კოლხი რაინდებიდან’.

ახალგაზრდულ ჩემპიონატზე უმცროს ბორჯღალოსნებს ერთ-ერთი ყველაზე ახალგაზრდა გუნდი ეყოლება. 30 მოთამაშიდან 14 2007 წელსაა დაბადებული და 20-წლამდელებში გაისადაც მოუწევს თამაში, ორი სულაც ორი წლით უმცროსი, 2008-წლიანია - მათე მახარაძე და გიორგი ხონელიძე.

მსოფლიო რაგბის ახალგაზრდულ ჩემპიონატს, 27 ივნისიდან 18 ივლისის ჩათვლით საქართველოს ორი ქალაქი - თბილისი და ქუთაისი უმასპინძლებს. პლანეტის 16 საუკეთესო გუნდი ჯამში 40 თამაშს გამართავს - 20-ს თბილისში და 20-ს ქუთაისში. შეგახსენებთ, საქართველო 20-წლამდელთა ჩემპიონატს მეორედ (პირველად 2017 წელს) მასპინძლობს.

საქართველო ა ჯგუფში მოქმედ ჩემპიონ სამხრეთ აფრიკასთან, უელსთან და ურუგვაისთან მოხვდა. ვიტო კოლელიშვილის შეგირდები პირველ მატჩს 27 ივნისს, 18:00 საათზე უელსის წინააღმდეგ გამართავენ, 2 ივლისს, 20:30 საათზე სამხრეთ აფრიკას ერკინებიან, ხოლო 7 ივლისს 20:30 საათზე ურუგვაის ეთამაშებიან. ჩვენი გუნდის ჯგუფური ეტაპის შეხვედრები თბილისში, “ავჭალაზე” შედგება.

მანამდე უმცროსი ბორჯღალოსნები 22 ივნისს 14 საათზე, რუსთავში, ახალი ზელანდიის წინააღმდეგ დასკვნით მოსამზადებელ შეხვედრას გამართავს.

უმცროსი ბორჯღალოსნების შემადგენლობა 2026 წლის მსოფლიო რაგბის ახალგაზრდულ ჩემპიონატზე

შენიშვნა:პირველად წერია კლუბი რომელშიც მოთამაშე ამჟამად თამაშობს, მეორედ - აღმზრდელი კლუბი

შერკინება:გიორგი ტურაშვილი (კასტრი, ლელო), ნიკოლოზ ბალანჩივაძე (ორიაკი, ოიონა), ლუკა იასეშვილი (ხარები, ხარები), დავით არჩვაძე (ლელო, ლელო), ანრი შველიძე (ბრივი, ბრივი), გიორგი აღნიაშვილი (კარკასონი, აკადემია), ლევან ეზიეშვილი (მონტობანი, ხვამლი), საბა ნოზაძე (ნევერი, არმაზი), გაბრიელ რაზმაძე (ორიაკი, ანტვერპენი), ნიკოლოზ ჩხორთოლია (მონპელიე, არმია), ანდრია ბილანიშვილი (ლელო, აკადემია), დავით ბარამია (ტულონი, ლელო), ლუკა ნარსია (აია, აია), გიორგი ზაზაძე (ხარები, ხარები), გიორგი არძენაძე (კოლხი რაინდები, ჩაქვი), ირაკლი ყოლბაია (ლელო, კოლხი რაინდები), მიხეილ შიოშვილი (ტულონი, ლელო);

ხაზი:გიორგი ხონელიძე (ტულონი, ლელო), დაჩი წიკლაური (ხვამლი, ხვამლი), თემურ ძოძუაშვილი (აია, აია), მათე მახარაძე (ხვამლი, ბათუმი), ლეონიდე სალდაძე (ლოკომოტივი, ლოკომოტივი), დავით ბარბაქაძე (ლიონი, არმია), დემეტრე დევდარიანი (ლელო, აკადემია), დათა ახვლედიანი (ლელო, ლელო), ავთანდილ ზვიადაძე (აია, აია), ლუკა ტაბატაძე (არმია, არმია), საბა ნატროშვილი (არმია, ლელო), ნიკოლოზ ხალვაში (ლელო, ჩაქვი), დათა არობელიძე (არმია, არწივები).

მთავარი მწვრთნელი:ვიტო კოლელიშვილი

მწვრთნელები:მიხეილ ნარიაშვილი, გიორგი ბეგაძე, თორნიკე ბუბუტეიშვილი, რატი შანიძე

მენეჯერი:ლაშა ლომიძე

ვიდეო ანალიზი:ნიკო გიგინეიშვილი

ექიმი:გოგა მირველაშვილი

ფიზიო:ირაკლი შაორშაძე, რომან სახოკია

ფიზ. მომზადება:გიორგი ნადარეიშვილი, გივი ნადარეიშვილი