ერთი გამარჯვება - ზედიზედ, მეორე ევროპის ჩემპიონატამდე. საქართველოს ხელბურთის ეროვნული ნაკრები მნიშვნელოვანი მატჩისთვის ემზადება. ჩვენი გუნდი, 8 მაისს, 17:00 საათზე, “თბილისი არენაზე” ევროპის ჩემპიონატის შესარჩევი ეტაპის მორიგ მატჩში საბერძნეთს უმასპინძლებს და გამარჯვების შემთხვევაში, ევროპის ჩემპიონატის საგზურს მოიპოვებს.
რაც შეეხება სატურნირო მდგომარეობას, 2026 წლის ევროპის ჩემპიონატის შესარჩევი ეტაპის ჯგუფში საქართველო 4 ქულით მეორე ადგილზეა, პირველი ისლანდიაა (8 ქულა),შემდეგ ბოსნია და ჰერცოგოვინა (2) და საბერძნეთი (2). საქართველოს ხელბურთის ნაკრები ჯგუფური ეტაპის დასკვნით შეხვედრას 11 მაისს რეიკიავიკში ისლანდიის წინააღმდეგ გამართვას.
საკვალიფიკაციო 8 ჯგუფიდან 2-2 საუკეთესო ნუკრებთან ერთად, 2026 წლის ევროპის ჩემპიონატზე 4 საუკეთესო მესამეადგილოსანიც იასპარეზებს. საქართველოს ნაკრები საბერძნეთთან გამარჯვების შემთხვევაში, პირდაპირ გავა ჯგუფიდან. 2024 წლის ევროპირველობაზე ჩვენი გუნდი საუკეთესო მესამეადგლიოსანის სტატუსით მოხვდა.
მოახლოებული მატჩებისა და საქართველოს ნაკრების სამზადისის შესახებ, საქართველოს ხელბურთელთა ეროვნული ნაკრების მთავარმა მწვრთნელმა, ტიტე კალანდაძემLa Gazzetta dello Sport Georgia-სთან ინტერვიუში ისაუბრა:
- საქართველოს ხელბურთელთა ნაკრებმა გასულ წელს ევროპის ჩემპიონატზე ითამაშა და ბოლო პერიოდში ვხედავთ, ეროვნული ნაკრების პროგრესს, ზედიზედ მეორედ, შეუძლია ევროპირველობაზე ასპარეზობა ჩვენ გუნდს, რა შეიცვალა ბოლო პერიოდში ხელბურთელთა ნაკრებში?
- დიახ, სწორად აღნიშნეთ, ბოლო წლების განმავლობაში ჩვენი გუნდი პროგრესირებს, რეგულარულად ტოპ მეტოქეებთან გვიწევს თამაში და ეს ყველაფერი დიდი შრომის დამსახურებაა. სადაც ახლა ვთამაშობთ აქ სუსტი გუნდი არ არსებობს, რეიტინგით ყველა ჩვენზე წინაა, თუმცა ჩვენ მაინც ვახერხებთ გამარჯვებას. ბოლო 2-მა მოგებამ ბოსნიასთან აჩვენა, რომ ჩვენ შეკრული გუნდი ვართ და ერთ მთლიანობას წარმოვადგენთ. წინასწარ საუბარი არ მიყვარს, თუმცა ჩვენ ყველა გუნდთან ვიბრძვით გამარჯვებისთვის.
- ევროპის ჩემპიონატის შესარჩევ ჯგუფურ ეტაპზე ბოლო ორი მატჩი საქართველომ ბოსნიას და ჰერცოგოვინას მოუგო, გუნდს რომელიც ევროპის ჩემპიონატზეც დავამარცხეთ, თუმცა ევროპირველობის შემდეგ, ჩვენი მეტოქე კიდევ გაძლიერდა და საქართველომ მაინც შეძლო გამარჯვება..
- როცა ევროპის ჩემპიონატზე პირველად ჩადიხარ, უდიდესი ტურნირია, რადგან მოგეხსენებათ, ხელბურთი ძირითადად ევროპული სპორტია. მსოფლიოს ჩემპიონატზე შესაძლოა მოხვდეს საშუალო დონის გუნდიც. როცა ევროპირველობაზე ხარ იქ ყველა ძლიერია. ბოსნიასთან, რა თქმაა უნდა, კარგი თამაში ვაჩვენეთ და მოვიგეთ. "თბილისი არენაზეც" დიდი ბრძოლა გავუმართეთ და საბოლოოდ ნახეთ, რომ გამარჯვება შევძელით, ასევე სტუმრადაც მოვუგეთ, ბოსნიას ბოლოს სამი შეხვედრა მოვიგეთ.
- რა ცვლილებებს უნდა ველოდოთ საქართველოს ნაკრებში წინა მატჩებთან შედარებით?
- ყოველთვის არის რისი ცვლილებაც მწვრთნელს უნდა, თუნდაც პატარ-პატარა ხარვეზების. თამაშიდან - თამაშამდე ვიზრდებით, რაც იმედის მომცემია. დიდ ცვლილებებს არ ვგეგმავთ. იგივე გუნდი ვიქნებით, ხაზეინ რუსტამოვი დაგვაკლდება, ასევე მოგეხსენებათ, ნიკოლოზ კალანდაძე ვერ გვეხმარება, რაც დიდი დანაკლისია და იმედია, ევროპის ჩემპიონატისთვის დაგვიბრუნდება.
- რას იტყვით საბერძნეთზე, პირველი თამაშიც ერთბურთიანი სხვაობით დავთმეთ…
- საბერძნეთი უძლიერესი გუნდია, ძლიერი ხელბურთელებით დაკომპლექტებული. გამოცდილები არიან, თუმცა ჩვენ ქართული ჟინით ვართ, ვაღიარებ ჩვენზე წინ არიან. პირველმა თამაშმა გვიჩვენა, რომ ჩვენ სტუმრად მოგებაც შეგვეძლო, ისინი მოედანზე მაქსიმუმს აკეთებენ და ჩვენ თუ მაქსიმუმი გააკეთეთ, ვფიქრობ, უძლურები იქნებიან.
- ჯგუფიდან მეორე ადგილით გასვლა შეგვიძლია...
- შემიძლია გითხრათ, რომ ასეთი გადამწყვეტი თამაში ჯერ არ გვქონია. მთელი ქვეყანა ელოდება ამ მატჩს. როგორც ფინალი ისეთივეა, ძალიან ახლოს ვართ, ერთი ბურთით გამარჯვებაც ნიშნავს, ევროპის ჩემპიონატის საგზურს.
- ჯგუფის დასკვნითი თამაში საქართველოს ნაკრებს ისლანდიაში ექნება..
- მთავარი ბრძოლა საბერძნეთთან გვაქვს, რადგან ამ თამაშის მოგების შემთხვევაში უკვე გვექნება ევროპირველობის საგზური და ისლანდიაში მხოლოდ პირველი და მეორეადგილოსანი გუნდის ვინაობა გაირკვევა. ისლანდია ძალიან გამოკვეთილი ლიდერია ჯგუფში, თუმცა ჩვენ გვინდა ასეთ დონეზე ავიდეთ, რისი პოტენციალიც ჩვენს გუნდს აქვს.
- გიორგი ცხოვრებაძეზე რას იტყვით, თქვენ აღმოაჩინეთ...
- მე იმ სკოლაში ვმუშაობ, სადაც გიორგი სწავლობდა, ჩემი მეუღლეც იქ კალათბურთის მწვრთნელია, პირველად მან შეამჩნია და მითხრა. გიორგი მაშინ 7 წლის იყო. თავიდანვე ეტყობოდა, რომ ყველაფერი შეეძლო. ისეთი მონაცემები ჰქონდა სპორტის ყველა სახეობას კარგად ითამაშებდა. შემდეგ გიორგის ბაბუას ვესაუბრე. ყველამ იცის ცხოვრებაძის შესაძლებლობები, გუნდის ლიდერია, დაჯილდოებულია ლიდერის თვისებებით, საკუთარ თავზე ბევრი რამის აღება შეუძლია, მხოლოდ აღება არა, გაკეთებაც, საქმესაც მაღალ დონეზე აკეთებს. ევროპის ხელბურთის ფედერაცია რეგულარულად აქვეყნებს გიორგი ულამაზეს გოლებს, თუ უმაღლესი დონის მოთამაშე არ ხარ ამას არ დადებენ, ასე რომ თავად ამტკიცებს გიორგი რომ ის ტოპ მოთამაშეა.
- ბოლო პერიოდს თვალი რომ გადავავლოთ, თვლით ამჟამინდელი ფორმაციის ნაკრები საუკეთესოა?
- დამოუკიდებელ საქართველოში ასეთი დონისა და შემადგენლობის გუნდი არ გვყოლია, ძლიერი მოთამაშეები სულ გვყავდა, მაგრამ საერთო ჯამში ასეთი პროგრესული გუნდი არ გვყოლია.
- ეს წარმატება ქართველი ხელბურთელების ევროპულ გუნდებში წარმატებულმა ასპარეზობამ განაპირობა?
- რა თქმა უნდა, ევროპულ გუნდებში არავის არ სჭირდება დაბალი დონის მოთამაშე. 90-იან წლებში ევროპაში გადასვლა რთული იყო, ახლა შედარებით მარტივია, თუმცა თუ ძლიერი არ ხარ არსად არ დაგიტოვებენ. ძალიან ძლიერი მეკარე გვყავს, ზურა ცინცაძე არის გუნდის ენერგეტიკა, მოტივაციის მიმცემი და ასეც უნდა იყოს, კარნახი და ტემპის მიცემა უნდა შეეძლოს, როცა მეკარე ბურთებს იგერიებს მერე გამარჯვება მარტივია. ირაკლი კბილაშვილზეც იმავეს ვიტყვი, ძალიან ჭკვიანია და ბევრ რამეს იღებს საკუთარ თავზე, ჩვენი კაპიტანი თემურ ორჯონიკიძე დაცვის ბურჯი, სისწრაფით, ნახტომით, ძალიან საჭირო მოთამაშეა. ასვე გიორგი დიხამინჯია ჩვენი ყველაზე სტაბილური მოთამაშე, რომელსაც თამაში არ ჩაუდგია, ხაზის მოთამაშეები, ერეკლე არსენიშვილი და სხვა. ყველა პოზიციაზე კარგი ხელბურთელი გვყავს და მაგიტომაა ჩვენი გუნდი ასეთი შეკრული.
- რას ეტყვით გულშემატკივარს?
- პირველ რიგში, მინდა ყველას მადლობა გადავუხადო. ჩვენ ვნახულობთ, ჩვენი კოლეგების, წარმატებული ქართველი სპორტსმენების საგულშემატკივრო ვიდეოებს. სპორტსმენებს სჭირდებათ, გულშემატკივარი, როგორც მოთამაშე აკეთებს თავის საქმეს ასევეა გულშემატკივარი, როცა ვიმარჯვებთ ერთად ვიმარჯვებთ. სავსე ტრიბუნები მოტივაციის მომცემია ჩვენი გუნდისთვის, მეტოქეზე კი უარყოფითად აისახება, ისე თავისუფლად ვეღარ ითამაშებენ. გულშემატკივარს უდიდესი ძალა აქვს. ამიტომაა მნიშვნელოვანი გავავსოთ ტრიბუნები და ერთად გავიმარჯვოთ.
