საქართველოს საიალქნო კლუბი თბილისის ზღვაზეპირველ საერთაშორისო რეგატას მასპინძლობს. ღონისძიება საქართველოში აფროსნობის განვითარების ხელშეწყობისთვის იმართება. შეჯიბრება დღეს დაიწყო, სამ ეტაპად ჩატარდება და გამარჯვებული 17 აგვისტოს გამოვლინდება.
საერთაშორისო რეგატა, სტუდიო ლიბერთის სტრატეგიული პარტნიორობით ტარდება და ტურნირის მიზანია, აფროსნობის პოპულარიზაცია, საერთაშორისო სპორტული ურთიერთობების გაღრმავება და თბილისის, როგორც სპორტული, ასევე ტურისტული პოტენციალის განვითარების ხელშეწყობა.
საქართველოს საიალქნო კლუბის ხელმძღვანელებმა სტრატეგიულ პარტნიორებთან, სტუდიო ლიბერთისა და ახალი ქართული ავიაკომპანია Oneclick -ის მხარდაჭერით, შეჯიბრების მონაწილეებსა და სტუმრებს თბილისის ზღვაზე გამორჩეული ატმოსფერო შეუქმნეს და იმედი აქვთ, რომ თბილისის საიალქნო კლუბი, ჯანსაღი ცხოვრების წესის დამკვიდრებისა და დასვენებისთვის ერთ-ერთი გამორჩეული ადგილი გახდება.
ტურნირის შესახებ საქართველოს საიალქნო კლუბის გენერალურმა დირექტორმა, კახაბერ ნონიაშვილმა და შეჯიბრების მონაწილეებმა ისაუბრეს:
კახაბერ ნონიაშვილი: საქართველო ზღვის ქვეყანაა და აფროსნობა უნდა განვითარდეს. დღევანდელი საშეჯიბრო დღე საკმაოდ დაძაბული აღმოჩნდა. იყო ცვალებადი ქარი, მოგვიწია რთული მუშაობა. რაც შეეხება საიალქნო კლუბს, ჩვენ კლუბში ბავშვებს დიდ ყურადღებას ვუთმობთ, 8 წლიდან გვყავს მოსწავლეები და გვინდა აღვზარდოთ მაღალი კონკურენციის უნარების მქონე სპორტსმენები.
თინათინ დომბროსკა: დღეს თბილისის ზღვაზე საერთაშორისო სტანდარტების გათვალისწინებით, პირველი რეგატა ჩატარდა, RS21 ტიპის ნავებით, ეს არის სწრაფი სპორტული ნავები. მე ვარ Georgian Sailing Club-ის ეკიპაჟის წევრი. რბოლა იყო საკმაოდ კარგი, ჩვენ ფინიშთან მეორეები მივედით, რაც ძალიან კარგი შედეგია, რადგან ამ შეჯიბრებაზე მსოფლიო იახტინგის ლიდერები მონაწილეობენ.
ეგორ ტერპიგორევი: მე Oneclick-ის გუნდში ვასპარეზობ. ბედნიერი ვარ დღევანდელი დღით და აქ ყოფნით, შესანიშნავი სანაოსნო ადგილია. ძალიან საინტერესოა აქ ყოფნა, დღეს მსუბუქი ქარი იყო, ფინიშთან პირველები ჩვენ მივედით, რაც რა თქმა უნდა, სასიხარულოა.
საქართველოს საიალქნო კლუბი ყალიბდება, როგორც ჯანსაღი ცხოვრების წესის დამკვიდრებისა და ელეგანტური დასვენების ერთ-ერთი გამორჩეული ადგილი. კლუბი წარმოადგენს აფროსნობის განვითარების სრულფასოვან ცენტრს, სადაც ფუნქციონირებს რამდენიმე ძირითადი მიმართულება:
ბავშვთა აფროსნობის სკოლა – ახალი თაობის ჩემპიონების აღზრდის კერა;
ზრდასრულთა კურსები – პრაქტიკული სწავლება კლუბის საკუთრებაში არსებულ თანამედროვე იახტებზე;
საერთაშორისო რეგატებში მონაწილეობა – საქართველოს ღირსეული წარმომადგენლობა მსოფლიო აფროსნობის არენაზე.
