საქართველოში სპორტული ორიენტირების მწვრთნელთა საგანმანათლებლო პროგრამის პირველი ეტაპი წარმატებით დასრულდა. სამდღიანი ტრენინგის მიზანი იყო მონაწილეებისთვის სპორტული ორიენტირების თეორიული და პრაქტიკული საფუძვლების გაცნობა, თანამედროვე სწავლების მეთოდების გაზიარება და ამ სპორტის პოპულარიზაციის ხელშეწყობა.
სამდღიანი პროგრამის განმავლობაში მონაწილეებმა შეისწავლეს სპორტული ორიენტირების ძირითადი პრინციპები, დისციპლინები და ფორმატები, სპორტული რუკის შექმნისა და გამოყენების საფუძვლები, ასევე საქართველოში სპორტული ორიენტირების განვითარების პერსპექტივები. პროგრამის პირველი ეტაპის დასრულების მიუხედავად, პროექტი გრძელდება.
მონაწილეები ივნისში კვლავ შეიკრიბებიან, სადაც საგანმანათლებლო პროგრამის შემდეგი ეტაპი უფრო ფართო პრაქტიკულ და საველე აქტივობებს დაეთმობა. პროგრამის ფარგლებში მონაწილეები მიიღებენ როგორც თეორიულ, ისე პრაქტიკულ ცოდნას სპორტული ორიენტირების მიმართულებით, ხოლო პროექტში ჩართული სკოლები სპორტული ორიენტირების ინვენტარით აღიჭურვებიან, რაც ხელს შეუწყობს სასწავლო და სპორტული აქტივობების განხორციელებას ადგილობრივ დონეზე.
პროექტის ერთ-ერთი მნიშვნელოვანი კომპონენტია საერთაშორისო გამოცდილების გაზიარება. პროგრამის ფარგლებში საუკეთესომ ონაწილეებს შესაძლებლობა ექნებათ გაემგზავრონ შვედეთში, გაეცნონ სპორტული ორიენტირების განვითარების წარმატებულ პრაქტიკას და მიიღონ გამოცდილება საერთაშორისო სპეციალისტებისგან.
აღნიშნული ინიციატივა ხელს შეუწყობს სპორტული ორიენტირების, როგორც საგანმანათლებლო და სპორტული აქტივობის, განვითარებას საქართველოში, ახალი შესაძლებლობების შექმნას ახალგაზრდებისთვის და საერთაშორისო თანამშრომლობის გაღრმავებას.
სპორტული ორიენტირება მსოფლიოში აღიარებული სპორტის სახეობაა, რომელიც აერთიანებს ფიზიკურ აქტივობას, რუკის კითხვას, სივრცით აზროვნებასა და სწრაფი გადაწყვეტილებების მიღების უნარს. მისი ხელმისაწვდომობისა და მრავალფეროვნების გამო, ორიენტირება ითვლება სპორტად, რომელიც ნებისმიერი ასაკისა და გამოცდილების მქონე ადამიანისთვისაა განკუთვნილი.
პროექტის ორგანიზატორების განცხადებით, პროგრამის მიზანია საქართველოში სპორტული ორიენტირების განვითარების ხელშეწყობა, ახალი მწვრთნელებისა და ლიდერების მომზადება, ასევე ამ სპორტის პოპულარიზაცია ახალგაზრდებსა და ფართო საზოგადოებაში.
