რუსთავის საერთაშორისო ავტოდრომზე წრიული რბოლების ეროვნული ჩემპიონატის მეორე ეტაპი ჩატარდა. ტურნირში 24 ავტომრბოლელი მონაწილეობდა. საქართველოს სპორტის მინისტრმა შალვა გოგოლაძემ ჩემპიონატის მიმდინარე ეტაპის პირველი რბოლის გამარჯვებული დააჯილდოვა. მეორე ეტაპის პირველი რბოლის გამარჯვებული სანდრო თავართქილაძე გახდა, მეორე რბოლის - გიორგი ბეჟიტაშვილი.
წრიული რბოლების ეროვნული ჩემპიონატის მეორე ეტაპს ასევე ესწრებოდნენ სპორტის მინისტრის პირველი მოადგილე ირაკლი მეძმარიაშვილი, საქართველოს საავტომობილო სპორტის ფედერაციის პრეზიდენტი სანდრო ლომაძე და სხვა მიწვეული სტუმრები.
წრიული რბოლების ეროვნული ჩემპიონატის მეორე ეტაპი გახსნა საქართველოს თავდაცვის ძალების ეროვნული გვარდიის სამხედრო-საჩვენებელმა ორკესტრმა, რომელმაც საქართველოს სახელმწიფო ჰიმნი შეასრულა. ჰიმნის შესრულებისას გადაიფრინეს ავიაციისა და საჰაერო თავდაცვის სარდლობის საბრძოლო მოიერიშე თვითმფრინავებმა SU-25.
ტურნირი რვაწლიანი პაუზის შემდეგ პირველად გასულ წელს ჩატარდა. ღონისძიება წარმოადგენს საქართველოს ერთ-ერთ ყველაზე მასშტაბურ საავტომობილო ჩემპიონატს, რომლის მიზანია ქვეყანაში ავტოსპორტის განვითარება და პოპულარიზაცია.
