დადასტურებულად — კარლო ანჩელოტის ვაჟი, დავიდე ანჩელოტი ფრანგულ ლილს ჩაიბარებს! მხარეებს შორის წინასწარი სიტყვიერი შეთანხმება უკვე შედგა და თუ ბოლო მომენტში რაიმე გაუთვალისწინებელი არ მოხდა, ლიგა 1-ის კლუბი 36 წლის სპეციალისტს ოფიციალურად უახლოეს დღეებში წარადგენს.
მას შემდეგ, რაც კარლო ანჩელოტიმ რეალ მადრიდი დატოვა, კლუბიდან დავიდე ანჩელოტიც წავიდა. ახალგაზრდა სპეციალისტის ბოლო დამოუკიდებელი გამოცდილება ბოტაფოგოში ჰქონდა, საიდანაც 2025 წლის მიწურულს წამოვიდა. ამჟამად დავიდე ბრაზილიის ეროვნული ნაკრების სამწვრთნელო შტაბში მუშაობს, თუმცა მსოფლიო ჩემპიონატის დასრულების შემდეგ კარიერას საფრანგეთში გააგრძელებს.
ლილის ხელმძღვანელობა დავიდე ანჩელოტიში თანამედროვე ხედვების მქონე მწვრთნელს ხედავს, რომელსაც როგორც ტაქტიკური, ისე ფსიქოლოგიური კუთხით ფეხბურთელებთან მუშაობის დიდი გამოცდილება უკვე დაუგროვდა. ფრანგული კლუბი იმედოვნებს, რომ ახალგაზრდა სპეციალისტის ხელში გუნდი სტაბილურად იბრძოლებს როგორც ლიგა 1-ის ზედა პოზიციებისთვის, ისე ევროტურნირებზე წარმატებული გამოსვლისთვის.
