ბურთების შეფარდება - 5:8. ამის გარდა, "მანკუნიანელებმა" ევროპა ლიგაზე საკუთარ კედლებში ტვენტეც კი ვერ დაამარცხეს. საფეხბურთო სამყარო ვარაუდობდა, რომ "ოცნებათა თეატრის" ბინადართა უფროსობა ერიკ ტენ ჰაგს გაუშვებდა, მაგრამ ის კვლავ კლუბშია. თავად თავკაცის თქმით, მისი წასვლა არც განიხილება.
საინტერესოა ის, რომ ნიდერლანდელი მწვრთნელის დანიშნვის შემდეგ, მისმა გუნდმა ტრანსფერებზე 666.080 მილიონი ევრო დახარჯა. ყველაზე ძვირადღირებული მოთამაშე მანჩესტერის ამჟამინდელი თავკაცის ეპოქაში არის ენტონი დოს სანტოსი, რომელშიც 95 მილიონი არის გადახდილი. ბრაზილიელმა ვინგერმა გვაჩუქა 84 მატჩში 12 ბურთი და უამრავი ინტერნეტ ხუმრობა საკუთარ თავზე.
სიძვირის მხრივ, ამსტერდამის აიაქსის ყოფილი გარემარბის შემდეგ მოდიან რასმუს ჰოილუნდი (73.9 მილიონი), კარლოს კაზემირო (70.6 მილიონი), მეისონ მაუნტი (64.2 მილიონი) და ლენი იორო (62 მილიონი). ამ უკანასკნელს ჯერ არ უთამაშია იუნაიტედში, დანარჩენების სარგებელზე საუბარიც უადგილო იქნება.
ასევე, "წითელმა ეშმაკებმა" 50 მილიონი ევრო გადაიხადეს ანდრე ონანაში, მეკარეში, რომელმაც ინგლისში გადმოსვლის შემდეგ, 59 შეხვედრაში 93 გოლი გაუშვა. რთული წარმოსადგენი იყო, რომ მილანის ინტერში ჩატარებული საოცარი სეზონის შემდეგ, კამერუნელი გოლკიპერი "მანკუნიანელებში" ანტი-რეკორდების მანქანად გადაიქცეოდა, მაგრამ 54 წლის თავკაცის ხელში, გასაკვირი აღარაფერია.
