Qatar Sports Investments-ის მოსვლიდან დღემდე, პარიზულმა გუნდმა ტრანსფერებზე საერთო ჯამში, დაახლოებით 2.5 მილიარდი ევრო დახარჯა, უფრო კონკრეტულად კი 2 430 600 000 მილიარდი ევრო. ჯერ მხოლოდ გასულ ზაფხულს "ლურჯ-წითლებმა" ახალი პროექტის წამოწყების მიზნით 455 მილიონი დახარჯეს.
ახალი პროექტი ემსახურებოდა ერთგვარ გადატვირთვას - წავიდნენ წამყვანი ფიგურები (ლიონელ მესი, სერხიო რამოსი, ნეიმარ ჟუნიორი, მარკო ვერატი) და მოვიდნენ ახალგაზრდები: ოსმან დემბელე, ლუკას ერნანდესი, ხავი სიმონსი, რანდალ კოლო მუანი, გონსალო რამოში და სხვები. როგორც ვხედავთ, პარკ დე პრენსზე მოსულმა ახალმა ნაკადმაც ვერ გაამართლა.
პარის სენ-ჟერმენის ისტორიაში ყველაზე ძვირადღირებული ფეხბურთელები არიან ზემოთ ხსენებული ნეიმარი (222 მილიონი) და კილიან მბაპე (180 მილიონი). ბრაზილიელი შემსრულებელი გასული ზაფხულის შემდეგ საუდის არაბეთშია, ფრანგი ფორვარდი კი მადრიდის რეალში გადასვლამდე, ფაქტობრივად, დღეებს ითვლის.
მთელი ამ დროის განმავლობაში კი პსჟ-ს საუკეთესო შედეგი ჩემპიონთა ლიგის ფინალი იყო, რომელშიც ისინი მიუნხენის ბაიერნთან დამარცხდნენ. ამის გარდა, აღსანიშნავია, რომ პარიზულმა გუნდმა გამოიცვალა 8 დამრიგებელი, მათ შორის კარლო ანჩელოტი, ტომას ტუხელი და ლუის ენრიკე, ე.წ. ჩემპიონთა ლიგის მომგები სპეციალისტები, მაგრამ ამის მიუხედავად, უშუალოდ "ლურჯ-წითლებში" წარმატების მიღწევა ვერც ერთმა მოახერხა.
