როგორც მოგეხსენებათ, საქართველოს ნაკრებისა და ბარსელონას ლეგენდების მატჩში მონაწილეობას ლეგენდარული რონალდინიო გაუჩოც მიიღებს. ბრაზილიელ ფლეიმეიქერს საფეხბურთო კარიერის მანძილზე უთამაშია 2 ქართველი ფეხბურთელის წინააღმდეგ, ესენი არიან კახა კალაძე და ლევან მჭედლიძე.
ამის გარდა, "სელესაოს" შემტევს უთამაშია ლატვიის ნაკრების წინააღმდეგ, რომლის მწვრთნელი იმ დროს რევაზ ძოძუაშვილი იყო. დავიწყოთ კალაძით, რომლის წინააღმდეგ ბარსელონას ყოფილმა მე-10 ნომერმა ითამაშა 3-ჯერ, ყველა შემთხვევაში ეს ევროპის ყველაზე პრესტიჟულ საკლუბო ტურნირზე მოხდა.
"ჯადოქარმა" ქართველი მცველი ერთხელ ჯერ დაამარცხა (2:1) ჯგუფურ ეტაპზე, 2004/2005 წლების სეზონში, ერთი წლის შემდეგ კი ნახევარფინალში. კატალონიელებმა მილანს პირველ შეხვედრაში მოუგეს მინიმალური ანგარიშით, საპასუხოში კი მათ შორის უგოლო ფრე დაფიქსირდა.
რაც შეეხება მჭედლიძეს, 2008/2009 წლების სეზონში მისი პალერმო რონალდინიოს "როსონერისთან" 0:3 განადგურდა. ორივე ფეხბურთელმა თამაში დაიწყო სათადარიგოთა სკამიდან, 57-ე წუთზე შემოვიდა ქართველი ფორვარდი, 7 წუთის შემდეგ კი ბრაზილიელი ფლეიმეიქერიც.
ბოლოს კი გაუჩოს სანაკრებო მატჩი ძოძუაშვილის მიერ გაწვრთნილი ლატვიის ეროვნული გუნდის წინააღმდეგ, 1999 წელს. ცნობისთვის, ეს იყო "კანარინიოს" ფლეიმეიქერის დებიუტი საერთაშორისო ასპარეზზე. მისმა გუნდმა ბალტიისპირელები გაანადგურა 3:0, თავად მან კი ასისტი გაიფორმა.
