სანამ ქართული გუნდები ევროტურნირებზე ასპარეზობას განაგრძობენ და ამ კვირაში უმნიშვნელოვანესი მატჩები ელით, ამ კვირაშივე უეფას ქალთა ჩემპიონთა ლიგაზე ქართული კლუბი ნიკე ლუსო ერთვება.
ნიკე ლუსო ჩემპიონთა ლიგის საკვალიფიკაციო ეტაპის ნახევარფინალში პოლონეთის ჩემპიონ ჩარნის 22 ივლისს დაუპირისპირდება, გამარჯვების შემთხვევაში კი ფინალში გავა და თუ იქაც მოიგებს, შემდეგ ეტაპზე გადავა. შეხვედრები პოლონეთის ქალაქ კატოვიცეში გაიმართება.
ამ მნიშვნელოვანი მატჩებისთვის ნიკე ლუსო გაძლიერდა და რამდენიმე ლეგიონერი დაიმატა, მათ შორის ქეით გოდენი - არსენალისა და საუთჰემპტონის ასაკობრივი გუნდების ყოფილი მოთამაშე. ტაისა რენატა, სოლანჟე, არინა სიტნიკოვა, იულია სლესარჩიკი.
გუნდის მთავარი მწვრთნელი გაგა კირკიტაძეა. ვაჟთა ფეხბურთში ის გაგრაში წარმატებული მუშაობით არის ცნობილი, ახლა კი ნიკე ლუსოსთან ერთად შეეცდება წარმატების მიღწევას.
"ვიცით, რომ მნიშვნელოვანი და რთული მატჩები გველის, რადგან სხვადასხვა ქვეყნის ჩემპიონ გუნდებთან მოგვიწევს პაექრობა. თყ მაქსიმუმს გავაკეთებთ და თავისუფლად ვითამაშებთ, წარმატების მიღწევა შეგვიძლია. საქართველოს წარმოვადგენთ და ჩვენი მისია უნდა შევასრულოთ", - განაცხადა კირკიტაძემ.
ნიკე ლუსი ქალთა ეროვნული ლიგის მიმდინარე სეზონის ლიდერიცაა. 18 ტურის შემდეგ, 51 ქულა აქვთ და უშუალო კონკურენტ გურიას ბურთების სხვაობით ასწრებენ.
გარდა ლეგიონერებისა, ნიკე ლუსოს გამორჩეული ადგილობრივი ფეხბურთელებიც ჰყავს, მათ შორის საქართველოს ნაკრების მეკარე თათია გაბუნია. 18 წლის კესო მეტონიძე, რომელმაც გასულ სეზონში 54 გოლი გაიტანა.
"საკმაოდ ძლიერი გუნდი გვყავს, ახალი ფეხბურთელებიც დავიმატეთ და ყველაფერი გავაკეთეთ, რომ გუნდი კარგ კონდიციებში ყოფილიყო. მზად ვართ და დარწმუნებული ვარ, რომ წარმატებას მივაღწევთ", - განაცხადა გუნდის მენეჯერმა ლევან მჭედლიძემ.
როგორც უკვე მოგახსენებთ, ქალთა ჩემპიონთა ლიგის საკვალიფიკაციო ეტაპის პირველ მატჩს ნიკე ლუსო 22 ივლისს, პოლონეთში, ადგილობრივი ჩარნის წინააღმდეგ გამართავს.
