საიდუმლო არ არის ის ფაქტი, რომ სერია ა-ში ადგილობრივი მწვრთნელების მუშაობას უფრო დიდ ყურადღებას აქცევენ სხვა ტოპ ლიგებთან შედარებით. კალჩოს მიმდინარე სეზონში 20 კლუბიდან 17-ს სწორედ იტალიელი დამრიგებელი ჰყავს. როგორც ვიცით, წელს სამშობლოს დაუბრუნდა ანტონიო კონტეც, რომელმაც ნაპოლი ჩაიბარა.
სერია ა-ს მიმდინარე სეზონში ის სამი უცხოელი მწვრთნელი არის: ესპანელი სესკ ფაბრეგასი (კომო), პორტუგალიელი პაულუ ფონსეკა (მილანი) და გერმანელი კოსტა რუნაიჩი (უდინეზე). კალჩო ადგილობრივი დამრიგებლების ნდობისა და აქტუალურობის მხრივ გასულ წლებშიც მოწინავე პოზიციებზე იყო.
სრულიად საპირისპირო სიტუაცია გვხვდება პრემიერ ლიგაში, სადაც უცხოელ მწვრთნელთა რაოდენობა შეადგენს 17-ს, ადგილობრივი კი მხოლოდ სამია. ესენი არიან: შონ დაიჩი (ევერტონი), ედი ჰაუ (ნიუკასლი) და გარი ო'ნილი (ვულვერჰემპტონი). თუ საქმე ეხება ზოგადად გაერთიანებულ სამეფოს, ამ 3-ეულს კიდევ 3 დამრიგებელი დაემატება.
საუბარია ჩრდილოეთ ირლანდიელ კირან მაკენას (იფსვიჩი), უელსელ სტივ კუპერსი (ლესტერი) და შოტლანდიელ რასელ მარტინის (საუთჰემპტონი) შესახებ. რაც შეეხება დანარჩენ ტოპ ლიგებს, პრიმერა დივიზიონში არსებული 20 დამრიგებლიდან, 15 არის ადგილობრივი, 5 კი - უცხოელი. საინტერესოა ის, რომ ესპანელი თავკაცები ჩემპიონატის ფავორიტ კლუბებში არ მუშაობენ.
უცხოელთა ხუთეული ასეთია - იტალიელი კარლო ანჩელოტი (რეალი), ჩილელი მანუელ პელეგრინი (ბეტისი), არგენტინელი დიეგო სიმეონე (ატლეტიკო), გერმანელი ჰანსი ფლიკი (ბარსელონა) და ურუგვაელი პაულო პეცოლანო (ვალიადოლიდი).
რაც შეეხება დარჩენილ 2 ტოპ ლიგას, იქ ბალანსი ყველაზე კარგად არის დაცული. ბუნდესლიგაში 9 მწვრთნელი არის ადგილობრივი, 11 კი უცხოელი. ლიგა 1-ში კი 10 ადგილობრივი და 8 უცხოელი მწვრთნელია.
