ჩემპიონობის გზაზე მყოფი ლივერპული
ლივერპული პრემიერ ლიგის უპირობო ფავორიტია და რთული წარმოსადგენია, რომ ვინმემ მოახერხოს ამ გუნდისთვის ღირსეული კონკურენციის გაწევა. სეზონის სტარტზე ჩემპიონობის კიდევ ერთ პრეტენდენტად მოიაზრებოდა მანჩესტერ სიტი, მაგრამ როდრი ერნანდესის ტრავმის შემდეგ, ეს გუნდი პირდაპირი მნიშვნელობით დაიშალა.
სხვაობა "წითლებსა" და "ქალაქელებს" შორის ამ დროისთვის 11 ქულას შეადგენს. საჩემპიონო რბოლაში მოიაზრებოდნენ ლონდონური გრანდებიც, მაგრამ მერსისაიდელებს მათთანაც აქვთ სერიოზული უპირატესობა: არსენალთან +5 ქულა, ჩელსისთან კი +9 ქულა. ეს ყველაფერი იმის გათვალისწინებით, რომ "სქაუზერებს" აღნიშნულ ტრიოზე 2 მატჩით ნაკლები აქვთ ჩატარებული.
რაც შეეხება დღევანდელ მოწინააღმდეგეს, ენფილდის ბინადრებსა და "მანკუნიანელებს" შორის სხვაობა არც მეტი არც ნაკლები 23 ქულა არის. პრემიერ ლიგის ლიდერის წარმატების მთავარი სულისჩამდგემლი არის არნე სლოტი, რომელიც თავის ამჟამინდელ გუნდს უბრალოდ იდეალურად მოერგო. ნიდერლანდელმა სპეციალისტმა იურგენ კლოპის საქმე ღირსეულად გააგრძელა.
დღევანდელ შეხვედრაში ყურადღების ცენტრში იქნება მოჰამედ სალაჰი, რომელიც თავისი გუნდის მსგავსად, ასევე ფეერიულ სეზონს ატარებს. ვარსკვლავურმა ეგვიპტელმა ფორვარდმა უკვე მოასწრო 26 მატჩში 20 ბურთის გატანა. სულაც არ არის ლოგიკას მოკლებული ის საუბრები, რომ ლივერპულის ლიდერი ოქროს ბურთის მოგების ნომერ პირველი პრეტენდენტია.
არ უნდა დაგვავიწყდეს ისიც, რომ "წითლების" მე-11 ნომერი ოლდ ტრაფორდის ბინადრების პერსონალური ღამის კოშმარია. თავად განსაჯეთ - 16 შეხვედრა, 15 ბურთი, ასეთია "ფარაონის" მონაგარი რუბენ ამორიმის გუნდის წინააღმდეგ. მასზე ხშირად ინგლისის 20-გზის ჩემპიონთა კარი არავის აუღია.
მერსისაიდელების გარშემო სუფევს იდილია, თუმცა ერთი სამწუხარო ფაქტი მაინც გვხვდება - 32 წლის თავდამსხმელის წასვლა. დიახ, პრაქტიკულად გადაწყვეტილია, რომ მიმდინარე სეზონის დასრულების შემდეგ, სალაჰი "სქაუზერებს" დაემშვიდობება. რამდენიმე დღის წინ, ეს თავად ვარსკვლავურმა ეგვიპტელმა ფორვარდმა განაცხადა.
უმძიმეს მდგომარეობაში მყოფი მანჩესტერი
როგორც აღვნიშნეთ, სხვაობა ენფილდის ბინადრებსა და მანჩესტერს შორის 23 ქულას შეადგენს. მე-14 ადგილი და შვიდი ქულა გასავარდნ ზონამდე - დიახ, იუნაიტედის მდგომარეობა კრიტიკულია. აღარაფერს ვამბობთ იმის შესახებ, რომ ეს გუნდი პრაქტიკულად მთელი სეზონის მანძილზე ბურთების უარყოფითი ბალანსით მოდის.
"ეშმაკებს" არ უშველათ მწვრთნელების გადანაცვლებამ. ერიკ ტენ ჰაგის ნაცვლად მოსულმა ამორიმმა ჯერჯერობით ვერ აუღო ალღო ვერც პრემიერ ლიგას და ვერც "მანკუნიანელებს". ამ ყველაფრის შედეგად, პორტუგალიელმა თავკაცმა უმოკლეს დროში რამდენიმე წაგება უკვე შემოგვთავაზა. ქომაგები უკვე სრული სერიოზულობით ვარაუდობენ, რომ "ოცნებათა თეატრის" ბინადრები შესაძლოა ჩემპიონშიპში დაქვეითდნენ.
არ ღირს იმის შესახებ საუბარი, თუ ვინ იქნება დღეს ფავორიტი და აუტსაიდერი. ამორიმის გუნდი უპირისპირდება პრემიერ ლიგის ლიდერს, რომლის გამჩერებელი ჯერჯერობით არ ჩანს. საინტერესოა ისიც, რომ მანჩესტერმა ლივერპულს პრემიერ ლიგაში ბოლოს მოუგო 2022 წლის აგვისტოში, სტუმრად კი 2016 წლის იანვარში.
ციფრები, ფაქტები, დანაკლისი
ეს იქნება რიგით 202-ე შეხვედრა აღნიშნულ გუნდებს შორის. 79-ჯერ აქამდე იმარჯვა იუნაიტედმა, 64-ჯერ მოიგეს "წითლებმა", 58 დაპირისპირება ფრედ დასრულდა. როგორც აღვნიშნეთ, ამ დუელის საუკეთესო გოლეადორი 15 ბურთით არის მო, რომელიც მოედანზე დღესაც იქნება. "ეშმაკებზე" ხშირად მერსისაიდელთა ლიდერი არავის უტანს.
უკვე ცხრა წელია, რაც "მანკუნიანელები" "სქაუზერთა" საშინაო არენაზე გამარჯვების მოპოვებას ვერ ახერხებენ. უკანასკნელი მოგების მომენტისთვის ენფილდის ბინადრების მე-11 ნომერი თამაშობდა ჯერ კიდევ რომაში, "ოცნებათა თეატრში" კი ლუი ვან გაალი მოღვაწეობდა. იმ მატჩში გამარჯვების მომტანი ბურთი უეინ რუნიმ გაიტანა.
დღევანდელ შეხვედრაში სლოტს არ ეყოლება იბრაჰიმა კონატე, ჯო გომესი და კონორ ბრედლი, ამორიმს კი მარკუს რაშფორდი, ლიუკ შოუ, ვიქტორ ლინდელოფი და მეისონ მაუნტი. ერთი სიტყვით, ლივერპულისა და მანჩესტერის ლეგენდარული დაპირისპირებისთვის ყველაფერი მზად არის.
