მორიგი მედალი პარიზიდან. საფრანგეთის დედაქალაქში მიმდინარე პარალიმპიურ თამაშებზე ნინო თიბილაშვილმა ეტლით ფარიკაობაში (ხმალი - A კატეგორია) ბრინჯაოს მედალი მოიპოვა.
ქართველმა მედლისთვის გადამწყვეტ შეხვედრაში ფრანგი ბრიანა ვიდი 15:11 დაამარცხა. ნინომ პარიზის პარალიმპიადის პირველ შეხვედრაში 15:5 მოუგო კორეელი კვონ ჰიუ კიონგს. მეოთხედფინალში ლი ჰონგკონგელ შვიდგზის პარალიმპიურ ჩემპიონ ელისონ იუ ჩუი ესს 15:4 სძლია. თიბილაშვილი ნახევარფინალში ქართველ პარამოფარიკავეს ტოკიოს პარალიმპიური თამაშების ჩემპიონს, ჩინელი გუ ჰეიანის დაუპირისპირდა და 6-15 დამარცხდა, რის შემდეგაც რეპეშაჟში გადაინაცვლა, სადაც დაძაბულ შეხვედრაში უკრაინელ ნატალია მორკვიჩს 15:14 სძლია.
ნინო თიბილაშვილმა პარალიმპიურ თამაშებზე კარიერაში მეორე მედალი მოიპოვა და ერთადერთი ქართველი პარასპორტსმენია, რომელსაც 2 პარალიმპიური მედალი აქვს. ნინომ ვერცხლი ტოკიოში დაისაკუთრა.
რაც შეეხება პარიზის პარალიმპიურ თამაშებს, ამ დროისთვის საქართველოს დელეგაციის ანგარიშზე 3 მედალია, ჩემპიონი პარამძლეოსნობაში, ბირთვის კვრაში გიგა ოჩხიკიძე გახდა, ბრინჯაოს მედლები კი პარატაეკვონდოში ანა ჯაფარიძემ და ეტლით ფარიკაობაში ნინო თიბილაშვილმა მოიპოვეს.
დღეს ეტლით ფარიკაობაში ქართველთაგან იასპარეზა ნაკრების გამოცდილმა წევრმა ირმა ხეცურიანმა (ხმალი - B კატეგორია), თუმცა მედლის მოპოვება ვერ შეძლო.
ხვალ პარალიმპიურ თამაშებზე 3 ქართველი იასპარეზებს, ნინო თიბილაშვილი და ირმა ხეცურიანი რაპირით ფარიკაობაში ეცდებიან მედლების მოპოვებას, ვლადიმერ ჭინჭარაული კი R9 - პნევმატური შაშხანიდან სროლაში 50 მეტრზე.
