როდრი ერნანდესი შეუერთდა იმ ფეხბურთელების ელიტურ სიას, ვინც კარიერის განმავლობაში მოასწრეს მსოფლიო ჩემპიონატის, ჩემპიონთა ლიგისა და ბალონ დ'ორის მოგება. აღნიშნულ სიას 4 წლის წინ შეემატა ლეო მესი, რომელსაც წარსულში არაერთხელ მოუგია ევროპის მთავარი საკლუბო ტურნირი და ოქროს ბურთი, მაგრამ მუნდიალის ტრიუმფატორი ის მხოლოდ 2022-ში გახდა.
ამ სიაში არგენტინელი შემტევისა და ესპანელი ნახევარმცველის ყოფნა ყველასთვის გასაგებია, საინტერესოა, ვინ არიან ელიტური კლუბის დანარჩენი წევრები? საპატიო სიის სათავეში ბობი ჩარლტონია, რომელმაც ზემოთ ხსენებული 3 ტიტული 1966-1968 წლების შუალედში მოიგო. ინგლისელ ფორვარდს 70-იან წლებში ფრანც ბეკენბაუერი და გერდ მიულერი შეემატნენ.
ლეგენდარული გერმანელი ფეხბურთელები სამმაგი გვირგვინის კლუბის წევრები 1972 - 1976 წლებში გახდნენ. სიაში შემდეგი, კიდევ ერთი საკულტო მოთამაშე, პაოლო როსი არის. ყველამ ვიცით, თუ როგორი გამორჩეული იყო მისთვის 1982 წელი (მუნდიალი, ბალონ დ'ორი), 1985-ში კი იტალიელმა ფორვარდმა ტურინის იუვენტუსთან ერთად ევროპის მთავარი საკლუბო ტურნირიც მოიგო.
დადგა ზინედინ ზიდანის ჯერიც, ვინც 1998 წელს მოპოვებულ ჯილდოებს (მსოფლიო ჩემპიონატი, ოქროს ბურთი), 2002-ში ჩემპიონთა ლიგაც მიამატა. ახლა კი იწყება ბრაზილიელი ჯადოქრების დომინაცია, პირველი - რივალდო ვიტორ ბორბა ფერეირა, რომელმაც სანატრელი ჯილდოები 1999-2003 წლებში მოიგო.
მეორე - რონალდინიო გაუჩო. 2002 წელს მოგებულ მსოფლიო ჩემპიონატს მან 2005 - 2006 წლებში ჩემპიონთა ლიგა და ოქროს ბურთიც მიამატა. მესამე: რიკი კაკა, ისევ იაპონია/სამხრეთ კორეის მუნდიალი და შემდეგ უკვე მისთვის ტრიუმფალური 2007 წელი. როგორი გასაკვირი და სამწუხაროც არ უნდა იყოს, ელიტურ კლუბში ადგილი რონალდო ნაზარიოსთვის ვერ მოიძებნა.
რაც შეეხება თანამედროვე ეპოქას, მანჩესტერ სიტის ნახევარმცველამდე, ელიტური სიის ბოლო წევრი უსმან დემბელე იყო. ვარსკვლავურმა გარემარბმა 2025-ში პარი სენ-ჟერმენთან ერთად დაისაკუთრა პრაქტიკულად ყველა ტიტული, რაც კი შეიძლებოდა, ისევე როგორც გასულ სეზონშიც. უშუალოდ მუნდიალი ფრანგმა ვინგერმა ჯერ კიდევ 2018-ში მოიგო.
