საქართველოს ნაკრებთან მატჩამდე განვლილი გზა
დიდი საჰერცოგო არასდროს გასულა მსოფლიოსა თუ ევროპის ჩემპიონატებზე და მთელი თავისი ისტორიის მანძილზე, კონტინენტის ერთ-ერთ ყველაზე სუსტ ნაკრებად მოიაზრებოდა. "წითლების" ისტორიაში მრავლად არის გამანადგურებელი ანგარიშით წაგებები, ყველაზე დიდი სხვაობა, 0:9, რომელიც წარსულში 4-ჯერ გვხვდება.
ლუქსემბურგს ცხრაგოლიანი უპირატესობით ორჯერ მოუგო ინგლისმა (1960 და 1982 წლებში), ერთხელ გერმანიამ (1936 წ.) და ცოტა ხნის წინ, პორტუგალიამაც, გასული წლის სექტემბერში. ყველაზე მეტი, 11 ბურთი "ლომების" კარში კრიშტიანუ რონალდუს აქვს გატანილი. ნაკრების საუკეთესო გოლეადორი 20 ბურთით არის ბრატისლავის სლოვანის ფორვარდი, ჟერსონ როდრიგეში, რომელის შესახებ უფრო ვრცლად ქვემოთ ვისაუბრებთ.
იყო დრო, როდესაც დიდი საჰერცოგო ფიფას რეიტინგში 195-ე ადგილზე იმყოფებოდა (2006 წლის აგვისტოში). დღეს, "წითლები" 85-ე პოზიციაზე არიან და შეიძლება ითქვას, რომ თავისი ისტორიის საუკეთესო პერიოდს გადიან. ფაქტია, დიდ ტურნირზე გასვლასთან ასე ახლოს, ეს გუნდი აქამდე არასდროს ყოფილა.
ერთა ლიგის ჯგუფში, სადაც განთესილი იყო ლიუკ ჰოლცის გუნდი, პირველ ადგილზე გავიდა თურქეთი, თუმცა იმის გათვალისწინებით, რომ აღნიშნული ნაკრები ევრო 2024-ზე ისედაც გავიდა შესარჩევი ეტაპიდან, ერთა ლიგის 1/2 ფინალში თამაშის ბედნიერება წილად ხვდა მეორეადგილოსანს, ანუ ლუქსემბურგს, რომელმაც ლიეტუვასა და ფარერებს აჯობა.
გამოცდილება საქართველოს ნაკრებთან
ურთიერთშეხვედრების ისტორია ოთხ ამხანაგურ მატჩს ითვლის. ორჯერ იმარჯვა საქართველომ, ერთი მოგება არის "ლომების" ანგარიშზე, ერთი თამაში ფრედ დასრულდა. მივყვეთ ქრონოლოგიურად, 2001 წლის 15 აგვისტო: ჩვენი ნაკრები იგებს 3:0-ს, გიორგი დემეტრაძის დუბლითა და რატი ალექსიძის გოლით.
2007 წლის 22 აგვისტო: უგოლო ფრე. 2012 წლის 15 აგვისტო: 2:1 ისევ "ჯვაროსნების" სასარგებლოდ, გოლები გაიტანეს ლევან მჭედლიძემ, ალექსანდრე ამისულაშვილმა და ორელიენ ხოაკიმმა. 2018 წლის 5 ივნისი: დიდი საჰერცოგოს მინიმალური ანგარიშით მოგება, გოლის ავტორი კი ისევ და ისევ ხოაკიმია.
ამჟამინდელი მდგომარეობა
ამ დროისთვის "წითლების" საუკეთესო ფეხბურთელად მაინცის ცენტრალური ნახევარმცველი, ლეანდრო ბარეირო მოიაზრება. მისი სატრანსფერო ღირებულება 14 მილიონი ევროა, რითაც ის ჰოლცის გუნდის ყველაზე ძვირადღირებული მოთამაშეც არის. ასევე, გამოსარჩევია ზემოთ ხსენებული ჟერსონიც, რომელიც 26 მარტისთვის სასამართლოს გადაწყვეტილების მოლოდინშია.
საქმე ისაა, რომ ლუქსემბურგელ თავდამსხმელს ბრალად ედება ოჯახური ძალადობის ფაქტი, თუმცა ის ეროვნული გუნდის განაცხადში მაინც მოხვდა და დიდი ალბათობით, საქართველოს ნაკრების წინააღმდეგაც ითამაშებს. რაც შეეხება "ლომების" დანაკლისს, ერთა ლიგის 1/2 ფინალში ვერ ითამაშებს 4 ფეხბურთელი: დანიელ სინანი (დისკვალიფიკაცია), დირკ კარლსონი, მარვინ მარტინსი, ვინსენ ტილი (სამივე ტრავმა).
ოთხივე ფეხბურთელი დიდი საჰერცოგოს ძირითადი შემადგენლობის წევრად ითვლება. მათ გარეშე კი სასტარტო თერთმეტეული სავარაუდოდ ასეთი იქნება: მორისი, კორაჩი, შანო, მაჰმუტოვიჩი, რუპილი ოლესენი, ბარეირო, ბონერტი, იანსი, მურატოვიჩი, ჟერსონი.
