ევროპა ლიგის მესამე საკვალიფიკაციო ეტაპზე იბერია საკუთარ მოედანზე ლარნეს დაუპირისპირდება და გამარჯვების შემთხვევაში, მინიმუმ კონფერენს ლიგის ჯგუფს გაინაღდებს.
ამ მნიშვნელოვანი მატჩის წინ კომენტარი იბერიას მთავარმა მწვრთნელმა ანდრი დემჩენკომ და კაპიტანმა გიორგი ჯინჯოლავამ გააკეთეს.
გიორგი ჯინჯოლავა: "წინა თამაშის ხარისხით კმაყოფილები ჩვენც არ ვართ, თუმცა იმ პირობებში, რა პირობებშიც თამაში მოგვიწია, შედეგი ნორმალურია. ხელოვნურზე ბევრჯერ გვითამაშია, თუმცა ის სხვანაირი ხელოვნური იყო, ბურთი სხვანაირად მოძრაობდა და ზუსტი პასის გაკეთება გვიჭირდა. ფრენა, ღამის თენება, ბევრი ფაქტორი იყო და ეს ხარვეზები განმეორებით მატჩში უნდა გამოვასწოროთ. თუ მათ ის ილუზია შეექმნათ, რომ უკვე გასულები არიან, ცუდია, რადგან შინ თამაში ვერ მოიგეს, ჩვენ კი საკუთარ მოედანზე უპირატესობა გვაქვს. მათ ილუზიებს პასუხს მოედანზე გავცემთ. წლების ასეთი თამაში საკლუბო ფეხბურთში არ გვქონია და წნეხი დიდია. ყველას ფეხბურთელს გვიხარია, რომ ამ ყველაფრის თანამონაწილეები ვართ და ფსიქოლოგიურად კარგად ვართ მომზადებული."
ანდრი დემჩენკო: "იმ ფაქტორების გათვალისწინებით, რაც ვთქვით, ბევრი ხარვეზი გვქონდა, თუმცა საბოლოოდ მთავარი მაინც შედეგია და ეს შედეგი ხვალ ჩვენს სასარგებლოდ უნდა დავასრულოთ. კარგად ვაცნობიერებთ ამ მატჩის ისტორიულ მნიშვნელობას. ხვალ სულ სხვა იბერიას ვიხილავთ, გამოვასწორებთ იმ შეცდომებს, რომლებიც ჩრდ.ირლანდიაში დავუშვით, ყველაფერს მოთმინებით უნდა მივუდგეთ და ჩვენი თამაში ვაჩვენოთ. ძალიან მნიშვნელოვანია, რომ ჩვენი გუნდი ფსიქოლოგიურად კარგად იყოს მომზადებული, ამაზე ბევრი სამუშაო გავწიეთ და შევეცადეთ, წნეხი მინიმუმამდე დაგვეყვანა. "
