LaGazzetta.ge ვარშავაშია და აქტიურად გაგიზიარებთ ამ მატჩის ირგვლივ მიმდინარე მოვლენებს. მადრიდის რეალის მატჩის წინა ვარჯიშსაც დავესწარით.
კარლო ანჩელოტიმ თავის შეგირდებთან - დანი კარვახალსა და ფედე ვალვერდესთან ერთად პრესკონფერენცია გამართა, რამდენიმე კითხვას უპასუხა, მათ შორის ჩვენ მიერ დასმულსაც და ვარჯიშისკენ გაეშურა.
მინდორზე გამოსული პაპა კარლო პირველი კილიან მბაპესთან მივიდა, რამდენიმე სიტყვა უთხრა, მბაპეც გაეხუმრა და ამ პოზიტიური დიალოგის შემდეგ, ანჩელოტიმ მთელი გუნდი თავისთან შემოიკრიბა.
იტალიელ სპეციალისტს პატარა მონოლოგი ჰქონდა. ანჩელოტიმ რეალის ყველა ფეხბურთელს გაახსენა, რომ ეს სამეფო კლუბია და მათთვის ყველა ტიტული მნიშვნელოვანია, მათ შორის სუპერთასიც.
ვარჯიში პოზიტიურად მიმდინარეობდა. ვარშავაში მაღალი ტემპერატურაა, ყველა მოკლე მაისურით იყო, გარდა ტიბო კურტუასი, რაზეც ვინისიუსი მას მთელი ვარჯიში ეხუმრებოდა: "ხომ არ გცივა კიდევ მოგიტან რამესო".
აღსანიშნავია, რომ კარლო ანჩელოტი ვარჯიშის აბსოლუტურად ყველა ფაზაში ბოლომდე ჩართული იყო. მომენტებში ვარჯიშსაც აჩერებდა, რათა ამა თუ იმ ფეხბუთელებისთვის კონკრეტული დავალებები მიეცა. აშკარაა, რომ მან ფედე ვალვერდეს როლი შეუცვალა და შედარებით უკნიდან, კროოსის სტილში ათამაშებს.
ბელინგემი ჩვეული მოძრაობებით და საოცარი პასებით ვარჯიშზე გამორჩეული იყო, თუმცა საუკეთესო მაინც ენდრიკი იყო, რომელსაც ანჩელოტი აწეული წარბით ამაყად უყურებდა და ბედნიერი იყო იმით, რომ რეალის მომავალი დაცულია.
მოვიდა დარტყმების დრო, სადაც მთელი გუნდი კილიან მბაპეს გოლებს გულშემატკივეობდა. კილიანი გუნდში კარგად მიიღეს, გაიაზრეს თუ რა დონის მოთამაშესთან აქვთ საქმე და ხელს უწყობენ, რომ გოლების მხრივ მალე გაიხსნას და თავისი თამაში იპოვოს.
რაც არ უნდა გასაკვირი იყოს, ვარჯიშზე ყველაზე მეტი გოლი რუდიგერმა გაიტანა. ამბობენ, როგორც ვარჯიშზე დაიხარჯები და რასაც ვარჯიშზე გააკეთებ, თამაშზე გადაგყვებაო, თუ ამ თეორიას დავუჯერებთ, დღეს ატალანტასთან რუდიგერის გოლს უნდა ველოდოთ.
ვარჯიშის შემდეგ, ჯუდ ბელინგემი და ვინისიუს ჯუნიორი ერთმანეთს პენალტების დარტყმაში ეჯიბრებოდნენ. ჯუდმა თავიდან მიზანი ვერ გაისწორა, შემდეგ კი მიჯრით რამდენიმე გაიტანა.
ზემოთ ბევრჯერ ვთქვით, რომ მთელი ვარჯიში პოზიტიურად მიდიოდა, თუმცა ვარჯიშის ბოლოს, ედუერდო კამავინგას ფეხში ცუდად მოხვდა, მისი ყვირილის ხმა მთელმა ვარშავამ გაიგო, მოედნიდან კი ძლივს გაიყვანეს. კამავინგას ტრავმაზე ყველაზე მძაფრი რეაქცია ჯუდ ბელინგემს ჰქონდა, რომელიც ეპიზოდს ყველაზე კარგად ხედავდა. კარგ ხასიათზე მყოფი ბელინგემი მოედნიდან გაბრაზებული გავიდა.
დღევანდელმა ვარჯიშმა დაგვახანა, თუ რატომ არის რეალი მსოფლიოში საუკეთესო კლუბი. ანჩელოტი თითოეულ თავის ფეხბურთელს საკუთარი შვილივით ექცევა და ეს ერთი დიდი ოჯახი დღეს მორიგი ტიტულის მოგებას შეეცდება.
