საოცარ ფორმაში მყოფი ლივერპული მოქმედი ჩემპიონის წინააღმდეგ
"წითლებს" სეზონის სტარტი მართლაც შთამბეჭდავი გამოუვიდათ. პრემიერ ლიგაში ჩატარებული 12 ტურის შემდეგ, პირველ ადგილზე 31 ქულით არიან სწორედ მერსისაიდელები, რომლებიც უახლოეს მდევარს, მანჩესტერ სიტის 8 ქულით უსწრებენ. რაც შეეხება ჩემპიონთა ლიგას, ერთადერთი გუნდი, რომელსაც ამ დროისთვის დაფიქსირებული აქვს 100%-იანი შედეგი, სწორედ "სქაუზერები" არიან.
დიახ, ენფილდელებმა ოთხ შეხვედრაში ოთხი გამარჯვება მოიპოვეს. მილანი, ლევერკუზენის ბაიერი, ლაიფციგი და ბოლონია - თითოეულმა მათგანმა სწორედ არნე სლოტის გუნდთან წააგო. ეს ყველაფერი იმის გათვალისწინებით, რომ ჩემპიონთა ლიგის ლიდერმა 4 მატჩში გაიტანა 10 ბურთი და მხოლოდ 1 გაუშვა.
იურგენ კლოპის მემკვიდრეობა ჯერჯერობით საიმედო ხელშია - მის ნაცვლად მოსული ნიდერლანდელი მწვრთნელი ლივერპულს იდეალურად მოერგო. იგივეს ვერ ვიტყვით "სამეფო კლუბზე", რომელმაც მიმდინარე სეზონში თავის ქომაგებს უკვე რამდენჯერმე გაუცრუა იმედი. სანაკრებო პაუზამდე, "ბლანკოსმა" ბარსელონასა და "როსონერისთან" წააგო.
ეს იყო სანტიაგო ბერნაბეუს ბინადრების პირველი ზედიზედ ორი საშინაო მარცხი 2009 წლის შემდეგ. ოსასუნასა და ლეგანესთან გამარჯვებით, განწყობა კარლო ანჩელოტის გუნდში ოდნავ გამოსწორდა, მაგრამ ცხადია, ქომაგებს სულ სხვა მოლოდინი აქვთ. "წითლებთან" მატჩი იქნება კარგი საშუალება იმის დასანახად, არის თუ არა რეალი კრიზისში სინამდვილეში.
არსებული ფორმიდან გამომდინარე, ფავორიტებად მოიაზრებიან მერსისაიდელები, თუმცა მადრიდული გუნდის დაუფასებლობა, მითუმეტეს ჩემპიონთა ლიგაზე შესაძლოა სავალალო იყოს. "სამეფო კლუბი" 6 ქულით არის 21-ე პოზიციაზე, რაც იმის მაუწყებელია, რომ მოქმედ ჩემპიონს სასწრაფოთ სჭირდება მდგომარეობის გამოსწორება.
ბევრი "ბლანკოსის" ჩავარდნას აბრალებს გუნდში კილიან მბაპეს ყოფნას. თითქოს ვარსკვლავურმა ახალწვეულმა მოქმედი ჩემპიონების შემადგენლობაში ბალანსი დაარღვია. არსებობს მოსაზრება, რომ ფრანგი ფორვარდი ვერ ახერხებს შეთამაშებას ანჩელოტის გუნდის მთავარ ვარსკვლავებთან: ვინი ჟუნიორსა და ჯუდ ბელინგემთან.
ბალანსის პოვნას ამ დროისთვის ვერც თავად იტალიელი მწვრთნელი ახერხებს. ვნახოთ, რა იქნება "სქაუზერებთან" შეხვედრაში, რომელსაც ცნობისთვის, ბრაზილიელი ფორვარდი ტრავმის გამო გამოტოვებს. მის გარდა, ბერნაბეუს ბინადრებს ასევე ვერ დაეხმარებიან დანი კარვახალი, დავიდ ალაბა, ედერ მილიტაო, როდრიგო გოესი და ორელიან ჩუამენი.
როგორც ვხედავთ, რეალის ლაზარეთი გადატვირთულია. ენფილდელების მხრიდან კი ალისონ ბეკერი, ფედერიკო კიეზა და ჰარვი ელიოტი ვერ ითამაშებენ. ერთადერთი პრობლემური საკითხი, რაც ტრიალებს სლოტის გუნდში გარშემო მო სალაჰის ბურუსით მოცული მომავალი არის. ჯერჯერობით უცნობია, დარჩება თუ არა ეგვიპტელი ფორვარდი ლივერპულში.
თავად "წითლების" ლიდერის სიტყვებით, ის წასვლასთან არის უფრო ახლოს, ვიდრე დარჩენასთან. სეზონის დასრულამდე კიდევ დიდი დროა, ვნახოთ, რას გადაწყვეტენ მერსისაიდელები თავისი მე-11 ნომრის მიმართებაში. არ ღირს ამაზე საუბარი ახლა, წინ ხომ მადრიდელებთან მატჩია, რომელიც პირადად "ფარაონისთვის" უპრინციპულესია.
თავად განსაჯეთ - 32 წლის თავდამსხმელმა "სამეფო კლუბის" წინააღმდეგ ითამაშა რვაჯერ და მის ანგარიშზე არის შვიდი მარცხი, ერთ ფრესთან ერთად. სალაჰს "ბლანკოსის" წინააღმდეგ წაუგია ჩემპიონთა ლიგის ფინალშიც, თანაც 2-ჯერ. ვნახოთ, შეძლებს თუ არა ის მოქმედი ჩემპიონის წინააღმდეგ სანატრელი რევანშის აღებას.
რაც შეეხება გუნდების ზოგად ურთიერთდაპირისპირებების ისტორიას, 11 შეხვედრა - შვიდჯერ იმარჯვეს სანტიაგო ბერნაბეუს ბინადრებმა, სამჯერ "სქაუზერებმა", ერთი მატჩიც ფრედ დასრულდა. კარიმ ბენზემასა და ანჩელოტის გუნდის ამჟამინდელი მე-7 ნომრის ანგარიშზე საერთო ჯამში 12 გატანილი ბურთია ენფილდელთა კარში.
სლოტის გუნდისთვის საბედნიეროდ, დღევანდელ შეხვედრაში არცერთი მათგანი არ იქნება. ფრანგმა თავდამსხმელმა რეალი დატოვა დიდი ხნის წინ, 24 წლის ფორვარდი კი როგორც აღვნიშნეთ, ტრავმირებულია. ვინისა და როდრიგოს არყოფნაში, მადრიდელთა სრულფასოვანი ლიდერი შეტევაში პარის სენ-ჟერმენიდან გადმოსული ვარსკვლავური ფორვარდი იქნება.
ჩემპიონთა ლიგის ყველა მატჩი:
21:45 - ცრვენა ზვეზდა-შტუტგარტი
21:45 - შტურმი-ჟირონა
23:55 - ლივერპული-რეალი
23:55 - ასტონ ვილა-იუვენტუსი
23:55 - დინამო ზაგრები-დორტმუნდი
23:55 - მონაკო-ბენფიკა
23:55 - ბოლონია-ლილი
23:55 - სელტიკი-ბრიუგე
23:55 - პსვ-შახტარი
