ბრესტი V პსჟ - კვარაცხელიას ჩემპიონთა ლიგაზე დაბრუნება
კვარაცხელიამ ჩემპიონთა ლიგაზე ითამაშა ორი სეზონი, რომელშიც ჩაატარა 17 შეხვედრა, გაიტანა ორი გოლი და გააკეთა ხუთი საგოლე გადაცემა. განსაკუთრებით წარმატებული ქართველ ვინგერს გამოუვიდა სადებიუტო სეზონი, რომლის დასრულების შემდეგ, ის ჩემპიონთა ლიგის საუკეთესო ახალგაზრდა მოთამაშედ დასახელდა.
ორს პლიუს ორი ამსტერდამის აიაქსთან, გაწამებული ტრენტ ალექსანდერ-არნოლდი და საგოლე გადაცემა ქუსლით ფრანკფურტის აინტრახთან - ყველაფერი ეს ხვიჩას სადებიუტო სეზონში იყო. რაც შეეხება მის მე-2 წელს, ახალგაზრდა ვინგერი შემოიფარგლა მხოლოდ 1 ასისტით, ჯგუფურ ეტაპზე უნიონ ბერლინთან.
ნაპოლი პირველ სეზონში შეაჩერა მილანმა, მეორეში კი ბარსელონამ. პარის სენ-ჟერმენის ახალწვეული შემტევის უკანასკნელი გოლი ჩემპიონთა ლიგაზე 2022 წლის 12 ოქტომბრით თარიღდება. ეს ყველაფერი უკვე ისტორიაა...ტკბილი მოგონება, რომელიც "პარტენოპეიში" დარჩა. პსჟ-ს მე-7 ნომრის კარიერაში ახალი გამოწვევების დრო დგება.
ჩემპიონთა ლიგის მერვედფინალში გასვლისთვის პარიზულ გუნდს ბრესტის ბარიერის გადალახვა სჭირდება. დიახ, ამ გუნდის წინააღმდეგ თამაშის გამოცდილება 23 წლის ვინგერს უკვე აქვს, მაგრამ საფრანგეთის ჩემპიონატში, დღეს კი ის "ლურჯ-წითლების" რიგებში ევროპის ყველაზე პრესტიჟულ საკლუბო ტურნირზე ითამაშებს.
"მეკობრეების" დამარცხების შემთხვევაში, ლუის ენრიკეს გუნდი ჩემპიონთა ლიგის მერვედფინალში ბარსელონასა და ლივერპულს შორის ერთ-ერთს შეხვდება. "წითლებთან" კვარას ნამდვილად აკავშირებს ტკბილი მოგონებები, "ბლაუგრანასთან" კი პირიქით. სწორედ ამ გუნდის წინააღმდეგ ჩაატარა თავისი ბოლო მატჩი ქართველმა ვინგერმა ევროსარბიელზე.
მანჩესტერ სიტი V რეალ მადრიდი - ანჩელოტისა და გუარდიოლას ბოლო დუელი?!
თანამედროვე ფეხბურთის კლასიკა, რომელმაც არაერთი დაუვიწყარი დაპირისპირება შემოგვთავაზა. საკმაოდ მაღალია იმის ალბათობა, რომ ეს კარლო ანჩელოტისა და პეპ გუარდიოლას ბოლო დუელი იყოს. ბევრი იწერება იმასთან დაკავშირებით, რომ რეალს მომავალ სეზონში ეყოლება ახალი სპეციალისტი, იტალიელი დამრიგებელი კი პენსიაზე გავა.
მადრიდული გუნდის ამჟამინდელი მწვრთნელის შეცვლის ნომერ პირველ კანდიდატად ჩაბი ალონსო მოიაზრება. ამის შესახებ საუბარი ჯერ ადრეა, იქამდე, 65 წლის სპეციალისტი ევროპის ყველაზე პრესტიჟული საკლუბო ტურნირის კიდევ ერთხელ მოგებას გეგმავს. შეგახსენებთ, მას უკვე აქვს 7 ტიტული: 5 დამრიგებლის რანგში, 2 კი მოთამაშის.
რაც შეეხება ესპანელ მწვრთნელს, როგორც ვიცით, მიმდინარე სეზონის დაწყებამდე მისი და მან სიტის კონტრაქტი ერთი წლით გახანგრძლივდა. მანჩესტერელთა სპეციალისტმა ბოლო თვეებში გამოიარა სრული ჯოჯოხეთი: ტრავმების ეპიდემია, კრიზისი, ანტირეკორდები და ა.შ. ინგლისის ჩემპიონატის ლიდერ ლივერპულთან ჩამორჩენა შეადგენს 15 ქულას და ნაკლებად სავარაუდოა, რომ ეს სხვაობა აღმოიფხვრას.
"წითლები" არიან შესანიშნავ ფორმაში, რასაც ვერ ვიტყვით "ქალაქელებზე". პრემიერ ლიგის მოგებაზე მეტად უფრო რეალური ამ გადმოსახედიდან ჩემპიონთა ლიგაზე ტრიუმფია, მაგრამ არ უნდა დაგვავიწყდეს ის ფაქტი, რომ "ლურჯებს" ამისთვის "სამეფო კლუბის" ბარიერის დაძლევა სჭირდებათ. დიახ, "ბლანკოსსა" და გუარდიოლას გუნდს შორის 1/8 ფინალში მხოლოდ ერთი გადის.
სხვა მატჩები
ჩემპიონთა ლიგის 16 საუკეთესო გუნდს შორის მოხვედრას ეცდება ტურინის იუვენტუსიც, რომლის მოწინააღმდეგე პსვ ეინდჰოვენი იქნება. პარალელურ მატჩში კი დორტმუნდის ბორუსია ლისაბონის სპორტინგთან გაარკვევს 1/8 ფინალის საგზურის ბედს. ასეთია პლეიოფის პირველი 4 წყვილი.
21:45 - ბრესტი-პსჟ
23:55 - მანჩესტერ სიტი-რეალი
23:55 - იუვენტუსი-პსვ
23:55 - სპორტინგი-დორტმუნდი
