ქალთა ჩემპიონთა ლიგაზე საქართველოს სახელს მოქმედი ჩემპიონი ნიკე ლუსო წარადგენდა. ლუსომ პოლონეთის ქალაქ კატოვიცეში ორი შეხვედრა ჩაატარა.
სამწუხაროდ, ნახევარფინალურ მატჩში გაგა კირკიტაძის გუნდი პოლონეთის მოქმედ ჩემპიონთან, მასპინძელ სასნოვიეცისთან 7:1 დამარცხდა.
მესამე ადგილისთვის მატჩში კი ქართულმა კლუბმა დამაჯერებელი გამარჯვება მოიპოვა და ჩრდ.მაკედონიის ჩემპიონი სკოპიე 2:0 დაამარცხა.
ლუსომ თითო ტაიმში თითო გოლი გაიტანა. ანგარიში კესო მეტონიძემ გახსნა, მატჩს კი საბოლოო წერტილი ირინა ხაბურზანიამ დაუსვა.
ეს გამარჯვება მნიშვნელოვანი იყო სარეიტინგო ქულებისთვის, რადგან მომდევნო წელს, ჩემპიონობის შემთხვევაში, ნიკე ლუსო საკვალიფიკაციო ეტაპზე განთესილთა შორის იყოს.
გაგა კირკიტაძე (ნიკე ლუსოს მთავარი მწვრთნელი): "საინტერესო გამოცდილება მივიღეთ, რაც მომავალში სწორი აქცენტების დასასმელად გამოგვადგება. ასეთი თამაშები გვაძლევს შესაძლებლობას, რომ გავიზარდოთ. პირველი მატჩის შემდეგ, შევძელით ხასიათის პოვნა, რომ მეორე მატჩში ხარისხი გამოგვესწორებინა. კარგად ვითამაშეთ, ორი გოლი გავიტანეთ, მაგრამ მეტის გატანაც შეგვეძლო"
კესო მეტონიძე (ნიკე ლუსოს ფეხბურთელი): "ბედნიერი ვარ, რომ გავიმარჯვეთ, ეს მოგება მნიშვნელოვანი იყო. ახლა კონცეტრირება შიდა ჩემპიონატზე უნდა მოვახდინოთ. ჩემთვის ეს დიდი გამოცდილება იყო, რადგან ევროტურნირებზე პირველად ვითამაშე. ჩვენი მიზანია, რომ აქ დავბრუნდეთ და უკეთესი შედეგი დავაფიქსიროთ"
