პრემიერ ლიგამ დაადასტურა, რომ დამოუკიდებელმა კომისიამ მანჩესტერ სიტი ცხრა სეზონის განმავლობაში ფინანსურ წესებთან დაკავშირებულ ყველა სერიოზულ დარღვევაში დამნაშავედ ცნო. კომისიამ ასევე დაადასტურა კლუბის წინააღმდეგ წაყენებული ბრალდებების უმრავლესობა, რომლებიც ლიგის გამოძიებასთან თანამშრომლობაზე უარს უკავშირდებოდა.
დამოუკიდებელმა კომისიამ დაადგინა, რომ 2009/10-დან 2017/18 წლების სეზონების ჩათვლით:
მანჩესტერ სიტიმ არაერთ კომერციულ პარტნიორთან გააფორმა "ფიქტიური“ კონტრაქტები (რომლებშიც მხარეებს შორის არსებული რეალური შეთანხმება არ იყო ასახული), ასევე ეყრდნობოდა სხვა კომპანიებთან გაფორმებულ "ფიქტიურ“ შეთანხმებებს, რათა კლუბის შემოსავლები ხელოვნურად გაეზარდა და ხარჯები შეემცირებინა. კლუბი ფინანსურ ანგარიშებს არასწორად ასახავდა და აუდიტორებსა და საფეხბურთო მარეგულირებლებს საკუთარი ფინანსური მდგომარეობის რეალურ სურათს უმალავდა. მანჩესტერ სიტი მნიშვნელოვნად არღვევდა როგორც პრემიერ ლიგის, ისე უეფას მიერ დაწესებულ ხარჯვით ლიმიტებს.
პრემიერ ლიგის გამოძიების მიმდინარეობისას მანჩესტერ სიტიმ ლიგასთან თანამშრომლობისა და კეთილსინდისიერების ვალდებულებები არაერთხელ დაარღვია (ოთხი სავარაუდო დარღვევიდან სამი დადასტურდა). დამოუკიდებელმა კომისიამ დაადგინა, რომ აღნიშნულ პერიოდში მანჩესტერ სიტიმ რამდენიმე სპონსორთან "ფიქტიური“ კომერციული გარიგებები გააფორმა, რომლებიც დაფარული დაფინანსების სქემის ნაწილი იყო. ამ სქემის მიხედვით, კომპანიებს შესაბამისი სპონსორული თანხების მხოლოდ ნაწილის გადახდა ევალებოდათ, ხოლო დარჩენილ თანხას აბუ-დაბი იუნაიტედ გრუპ ინვესტმენტ ენდ დეველოპმენტ ლიმიტედი (ADUG), რომელიც კლუბს ფლობდა, აფინანსებდა.
ამავე სქემის ფარგლებში, ADUG-ის დაფინანსებით კიდევ რამდენიმე "ფიქტიური“ შეთანხმება გაფორმდა, რაც კლუბს საშუალებას აძლევდა, რეალურ ხარჯებზე ნაკლები საოპერაციო ხარჯები დაეფიქსირებინა. ასევე არსებობდა "ფიქტიური“ წრიული შეთანხმება Fordham-თან, რომელიც კლუბის ფეხბურთელების იმიჯის უფლებებს ყიდულობდა და რომელსაც ასევე ADUG აფინანსებდა.
პრემიერ ლიგამ დამატებით განაცხადა:
როგორც კომისიამ დაადგინა, ამ სქემების მიზანი იყო კლუბის შემოსავლების ხელოვნურად გაზრდა და ხარჯების შემცირება. აღნიშნულმა თანხამ შესაბამის პერიოდში 900 მილიონ ფუნტს გადააჭარბა, რათა კლუბს ფინანსურ წესებთან შესაბამისობის შთაბეჭდილება შეექმნა. ამის შედეგად, როგორც კომისიამ დაადგინა, კლუბმა ფინანსურ ანგარიშებში არასწორი მონაცემები წარადგინა და აუდიტორებსა და საფეხბურთო მარეგულირებლებს საკუთარი ფინანსური მდგომარეობის რეალური სურათი დაუმალა. კომისიამ დაასკვნა, რომ "კლუბის ქმედებები აშკარად მიუთითებდა პრემიერ ლიგის წესების გვერდის ავლის განზრახვაზე“.
შედეგად, მანჩესტერ სიტიმ პრემიერ ლიგის მოგებისა და მდგრადობის წესების (PSR) და უეფას საკლუბო ლიცენზირებისა და ფინანსური ფეარ-პლეის წესების ფარგლებში საკუთარი შემოსავლებისა და ხარჯების შესახებ ზუსტი ინფორმაცია არ წარადგინა. კომისიამ დაადგინა, რომ ყველა შესაბამისი შეთანხმება კლუბის ფინანსურ ანგარიშებში ზუსტად რომ ასახულიყო, მანჩესტერ სიტი როგორც პრემიერ ლიგის, ისე უეფას ხარჯვით ლიმიტებს ძალიან მნიშვნელოვანი ოდენობით გადააჭარბებდა.
გარდა ამისა, პრემიერ ლიგის მიერ ჩატარებული ოთხწლიანი გამოძიების მიმდინარეობისას კლუბმა ლიგასთან თანამშრომლობისა და კეთილსინდისიერების ვალდებულებები არაერთხელ დაარღვია. კომისიამ დაასკვნა, რომ კლუბი "კოორდინირებულად ცდილობდა პრემიერ ლიგის გამოძიების შეჩერებასა და შეფერხებას“.
პრემიერ ლიგის აღმასრულებელმა დირექტორმა, რიჩარდ მასტერსმა, განაცხადა:
"ძირითადი გადაწყვეტილება ადგენს ფაქტებს იმის შესახებ, თუ რა ხდებოდა მანჩესტერ სიტიში აღნიშნულ პერიოდში. ის დეტალურად აღწერს, თუ როგორ არღვევდა კლუბი პრემიერ ლიგის წესებს სისტემატურად თითქმის ათი წლის განმავლობაში. ეს გადაწყვეტილება ასევე ადასტურებს პრემიერ ლიგის გადაწყვეტილების სისწორეს, გაეგრძელებინა საქმე მანჩესტერ სიტის წინააღმდეგ. მიუხედავად იმისა, რომ პროცესი დღემდე ხანგრძლივი და რთული იყო, ლიგა მტკიცედ იდგა პოზიციაზე, რომ ფაქტები დამოუკიდებლად დადგენილიყო.
პრემიერ ლიგის ერთ-ერთი უმნიშვნელოვანესი პასუხისმგებლობაა, უზრუნველყოს იმ წესების დაცვა, რომლებიც თავად კლუბებმა დაამტკიცეს, რათა კონკურენციის მთლიანობა იყოს დაცული. უმნიშვნელოვანესია, რომ ლიგა ყველა კლუბისა და გულშემატკივრისთვის კონკურენტუნარიანი და სამართლიანი დარჩეს. ჩვენ ამ პასუხისმგებლობას უკიდურესად სერიოზულად ვეკიდებით. ეს დისციპლინური საქმე და აღნიშნული გადაწყვეტილება პრემიერ ლიგის ისტორიაში ყველაზე მნიშვნელოვანი შემთხვევაა. საქმის გარკვეული საკითხები ჯერ კიდევ გადასაწყვეტია, მათ შორის, რაც განსაკუთრებით მნიშვნელოვანია, რა სანქცია უნდა მოჰყვეს აღნიშნულ დარღვევებს. ახლა, როდესაც კომისიის გადაწყვეტილება უკვე გვაქვს, მზად ვართ, სწრაფად გავიაროთ პროცესის დარჩენილი ეტაპები, რათა ლიგას, კლუბებსა და გულშემატკივრებს საბოლოო სიცხადე მივაწოდოთ.“
ახლა, როდესაც ბრალდებები დადასტურებულია, სანქციის საკითხი ცალკე განხილვის საგანი გახდება და ამისთვის დამატებითი მოსმენა გაიმართება.
მანჩესტერ სიტის აქვს უფლება, დამოუკიდებელი კომისიის გადაწყვეტილება გაასაჩივროს და ამისთვის კლუბს პარასკევამდე, 2 ოქტომბრამდე აქვს ვადა.
