მიმდინარე მსოფლიო ჩემპიონატის ერთ-ერთი ყველაზე დიდი უცნაურობა - ფოლარინ ბალოგუნის გადადებული წითელი ბარათი. დიახ, ბოსნიის ეროვნულ გუნდთან მიღებული გაძევება შეჩერებულია 1 წლით, რაც ნიშნავს იმას, რომ ამერიკელი ფორვარდი ბელგიასთან 1/8 ფინალურ შეხვედრაში ითამაშებს.
გადაწყვეტილებას წინ უძღოდა აშშ-ის პრეზიდენტ, დონალდ ტრამპისა და ფიფას პრეზიდენტ, ჯანი ინფანტინოს შორის გამართული კომუნიკაცია, რამაც საკითხს კიდევ უფრო დიდი პოლიტიკური და სპორტული რეზონანსი შესძინა. გამოდის, რომ მონაკოს ფორვარდის გაძევების გადავადება პირდაპირ თეთრი სახლის მოთხოვნით მოხდა.
ისტორიას კი ახსოვს ლეგენდარული ფეხბურთელების წითელი ბარათები, რომლების გაუქმებაშიც არავინ ჩარეულა. მოთამაშეები, ვინც სასჯელი პირნათლად მოიხადეს. პირველ რიგში შეგვიძლია გავიხსენოთ რონალდინიო გაუჩოს ბენეფისი იაპონია / სამხრეთ კორეის მუნდიალზე, ინგლისის ეროვნულ გუნდთან, რომელიც სწორედ გაძევებით დასრულდა.
საგოლე გადაცემის განხორციელებისა და გოლის გატანის შემდეგ, ბრაზილიელი შემტევი ეუხეშა დენი მილსს, რის გამოც მან მიიღო წითელი ბარათი, შედეგად კი გამოტოვა 1/2 ფინალური შეხვედრა თურქეთის ეროვნულ გუნდთან. იმავე მუნდიალზე გაფრთხილების ლიმიტის ამოწურვის გამო ბრაზილიასთან გადამწყვეტი დუელიმიხაელ ბალაკმა გამოტოვა.
1998 წლის მსოფლიო ჩემპიონატზე გაიბრწყინა ზინედინ ზიდანმა, თუმცა ერთი უსიამოვნო ინციდენტი უკავშირდება მასაც. ჯგუფური ეტაპის მეორე ტურში საუდის არაბეთის ეროვნულ გუნდთან უხეშობის გამო ფრანგი ფლეიმეიქერი გააძევეს, რის გამოც მან გამოტოვა მე-3 ტურის შეხვედრა დანიასთან და 1/8 ფინალი პარაგვაისთან.
მსოფლიო ჩემპიონატებზე სხვადასხვა დროს წითელი ბარათი ასევე მიუღიათ ალესანდრო კოსტაკურტას, ლორან ბლანს, პატრიკ კლუივერტს, ტიაგო სილვას, ლუის სუარესსა და სხვებს, მაგრამ მათი გაძევებები არ გადავადებულა. საინტერესოა ისიც, რომ "3 ლომისა" და მექსიკის შეხვედრაში წითელი ბარათი ჯარელ კუანსამაც მიიღო.
ინგლისელმა მცველმა წესით უნდა გამოტოვოს მეოთხედფინალური მატჩი ნორვეგიის ნაკრებთან, თუმცა სადაც აშშ-ს მე-20 ნომერს შეუმსუბუქეს სასჯელი, რატომ არ შეიძლება იგივეს გაკეთება მის მიმართებაშიც და სხვებისაც, რომლებსაც მოედნიდან გააძევებენ?!
