ბოლო ტურის წინ, სადაც ჰაიდენჰაიმი შინ მაინცს დაუპირისპირდება და გამარჯვების შემთხვევაში, ბუნდესლიგაში დარჩენის შანსებს დაიტოვებს, ბუნდესლიგის ოფიციალურმა გვერდმა ამ გუნდის ქართველ ლიდერთან ბუდუ ზივზივაძესთან საინტერესო ინტერვიუ ჩაწერა.
რამდენიმე კვირის წინ ჰაიდენჰაიმი თითქმის განწირული იყო და დარჩენის მცირე შანსები ჰქონდა, ბოლო დროს კი კარგი შედეგები გაქვთ და დარჩენის შანსები გაიზარდა. როგორ შეიცვალა სიტუაცია?
"კვირიდან კვირამდე პოზიტიურად ვფიქრობთ. ჩვენს თამაშებზე, მოგებაზე, თითოეული მათგანი ბრძოლაზე ვართ ორიენტირებულნი და ვფიქრობ, სწორედ ამიტომ გვაქვს კიდევ შანსი, რომ ბუნდესლიგაში დავრჩეთ“.
როგორია მოლოდინი მაინცთან გადამწყვეტი მატჩის წინ?
"როგორც ბოლო შეხვედრები, ამ თამაშშიც ბოლომდე ბრძოლას და გამარჯვებას ვაპირებთ. ვამაყობ, რომ ასეთი თანაგუნდელები მყავს, რადგან ისინი ბოლომდე კონცეტრირებულები არიან ყველა თამაშზე და დარწმუნებული ვარ, ხვალაც ასე იქნება"
აშკარაა, რომ ბოლო დროს, გუნდის მენტალიტეტი შეცვლილია, რისგან გამომდინარე მოხდა ეს?
"ვფიქრობ, ეს მწვრთნელისგან მოდის. მას ყოველთვის სჯერა, რომ თავისი გუნდი წარმატებას მიაღწევს და ეს ყველაფერი ფეხბურთელებზეც გადმოდის. მოგების მენტალიტეტი ყოველთვის მქონდა, მაგრამ აქ კიდევ უფრო ვისწავლე. სიმართლე გითხრათ, წინა კლუბებში ასეთი მენტალიტეტი არასდროს გვქონია"
რამდენად მნიშვნელოვანი იყო შენთვის ბაიერნთან ნათამაშები 3:3 მატჩი, სადაც დუბლი შეასრულე?
"წარმოუდგენელი იყო, რადგან ბავშვობაში ყოველთვის ვოცნებობდი დიდი გუნდების წინააღმდეგ თამაშზე, მაგრამ არასდროს მიფიქრია, რომ მათ ორ გოლს გავუტანდი, თან თავიანთვე სტადიონზე.ეს ჩემთვის დიდი დღე იყო, რადგან სტადიონზე მთელი ჩემი ოჯახი იმყოფებოდა. ისინი საქართველოდან სპეციალურად ამ თამაშისთვის ჩამოფრინდნენ. როდესაც ეს ორი გოლი მათ თვალწინ გავიტანე, წარმოუდგენელი გრძნობა იყო“
იყო ეს შენს კარიერაში საუკეთესო მატჩი?
"ეროვნულ ნაკრებთან ერთად ევრო 2024-ის ფლეი-ოფის მატჩი ვითამაშე და საუკეთესო მატჩი ჩემთვის ის იყო. როდესაც შენი ქვეყნის სახელით თამაშობ, განსაკუთრებული და საპასუხისმგებლოა, თუმცა ბაიერნთან თამაშიც გამორჩეული იყო მთელი ქალაქისთვის და კლუბისთვის."
რას ფიქრობ შენს თანამემამულე ხვიჩა კვარაცხელიაზე, რომელმაც პსჟ-ს მაისურით დიდი წვლილი შეიტანა ბაიერნის დამარცხებაში?
"ორივე ნახევარფინალურ მატჩში ის მოედანზე საუკეთესო იყო და ფინალში ხვიჩას ყველაფერ საუკეთესოს ვუსურვებ. მისით ვამაყობთ. საქართველოში ბევრმა ფეხბურთელმა, მათ შორის მეც, მოვიპოვეთ რწმენა, რომ საქართველოდან ჩამოსულ ბიჭს ასეთ მაღალ დონეზე შეუძლია თამაში და დავფიქრდი, რატომ არა მეც?"
