უკვე გადაწყვეტილია, რომ პსჟ-ს ქართველი ვარსკვლავის ხვიჩა კვარაცხელიას აგენტი ფრანგი მუსა სისოკო იქნება. სისოკო ისეთი ცნობილი ფეხბურთელების აგენტია, როგორებიც უსმან დემბელე, რაიან ჩერკი, დეზირე დუე, ბრედლი ბარკოლა და სხვები არიან.
მისი სააგენტოს სახელია MS FOOT, რომელიც 2026 წლის მონაცემებით, ყველაზე გავლენიანი საფეხბურთო სააგენტოების სიაში მე-9 ადგილს იკავებს.
სისოკოს თავის აგენტურ კარიერაში რამდენიმე საინტერესო ისტორია გადახდა. ის უსმან დემბელესთან ჯერ კიდევ იმ დროიდან მუშაობს, როცა დემბელე რენში ირიცხებოდა. სწორედ სისიკოს მუშაობას უკავშირდება დემბელეს ტრანსფერი დორტმუნდში, ბარსელონასა და ბოლოს პსჟ-ში.
დემბელეს ბარსელონაში ყოფნისას, სისოკოს ესპანურ მედიაში ბევრს აკრიტიკებდნენ და საკმაოდ აგრესიულ მოლაპარაკედ მიიჩნევდნენ. 2021/22 წლებში ბარსელონასა და დემბელეს შორის ახალ კონტრაქტზე მოლაპარაკებები თვეების განმავლობაში გაგრძელდა.
ფრანგი აგენტი ბარსელონას სპორტულ დირექტორს ხვდებოდა და როგორც ცნობილია, მთავარი პრობლემა ფეხბურთელისა და მისი აგენტის ფინანსური მოთხოვნები იყო. საბოლოოდ, დემბელემ კონტრაქტი არ გაახანგრძლივა და თავისუფალი აგენტის სტატუსით პსჟ-ს შეუერთდა. ამის შემდეგ გახდა სისოკო კატალონიელებისთვის საძულველი ადამიანი.
სისოკოს პრობლემები საფრანგეთის ფეხბურთის ფედერაციასთანაც ჰქონდა. 2019 წელს მას საქმიანობას უკრძალავდნენ, რადგან აგენტის ოფიციალური ლიცენზია არ ჰქონდა, თუმცა პრობლემა მალევე მოგვარდა. წელს კი სისოკომ ფრანგული ფეხბურთის ფედერაციას ევროპულ სასამართლოში უჩივლა, რადგან თვლის, რომ FFF მას აგენტის ანაზღაურების მიღებაში უკანონოდ უშლის ხელს.
წლების განმავლობაში, სისოკო მადრიდის რეალის ფრანგი ნახევარმცველის, ედუარდო კამავინგას აგენტიც იყო, თუმცა კამავინგას ოჯახმა სისოკოსთან ურთიერთობა გაწყვიტა და სხვა სააგენტოში გადავიდა.
