მიუნხენის ბაიერნი საოცარ ფორმაშია და ამაზე მეტყველებს ის ფაქტიც, რომ მიმდინარე სეზონში ბუნდესლიგის მთავარი დომინანტის წინააღმდეგ დუბლის გაფორმება მხოლოდ 7-მა მოთამაშემ შეძლო. აღნიშნულ სიაში გვხვდება 2 ქართველი ლეგიონერი: ბუდუ ზივზივაძე და ხვიჩა კვარაცხელია.
ჰაიდენჰაიმის თავდამსხმელმა "რეკორდმაისტერს" გაუტანა ბუნდესლიგაში, განვლილ შაბათ-კვირას, პარის სენ-ჟერმენის შემტევმა კი ჩემპიონთა ლიგის 1/2 ფინალში, ასევე გასულ კვირას. იმავე შეხვედრაში ალიანც არენას მკვიდრებს დუბლი უსმან დემბელემაც შეუსრულა. შეგახსენებთ, აღნიშნული დუელი ვენსან კომპანის შეგირდებმა პსჟ-სთან 4:5 წააგეს.
ჩამოთვლილი სამეულის გარდა, ბაიერნისთვის ამ სეზონში ერთზე მეტი გოლი ერთ მატჩში გაუტანიათ არდა გიულერს, დანილო დუხის, ფათიჰ კაიასა და ლეოპოლდ კუერფელს. აქვე დავამატებთ, წელს ჯერჯერობით არ ყოფილა შემთხვევა, რომ მიუნხენელთა კარში ვინმეს ჰეთ-თრიქი შეესრულებინოს.
