ამჯერად ბაიერნმა ყველაფერი გეგმის მიხედვით წარმართა და მოიგო - ანგარიშით 1:0.
შეხვედრის პირველი ნახევარი ბაიერნის სრული დომინირებით წარიმართა. ყველა იმ სტატისტიკურ კომპონენტში, რომელიც გუნდის შეტევით თამაშს აღწერს ხოლმე, მიონხენგლადბახს 0-იანი ეწერა - 0 xG, 0 დარტყმა ნოიერის კარისკენ (შესაბამისად, კარშიც), 0 კუთხური. ბორუსიელები მეკარე მორიც ნიკოლასმა სამჯერ გადაარჩინა, მათ შორის ტომას მიულერის დარტყმის დროს, როდესაც საოცარი რეაქციის გამოვლენა მოახერხა. თამაშის ასეთი სურათის ფონზე, ვენსან კომპანის გუნდს თითქოს ანგარიში მშვიდად უნდა წაეყვანა, თუმცა გოლი არ გასული. 45 წუთის თავზე ანგარიში 0:0 გახლდათ.
მეორე ტაიმი მიონხენგლადბახმა გაცილებით აქტიურად დაიწყო, ტემპიც გაზარდა და მომენტების შექმნასაც შეუდგა, თუმცა შეხვედრაში გარდატეხა მაინც ბაიერნმა მოახერხა. მაიკლ ოლისემ პენალტი მოიპოვა, რომელიც 68-ე წუთზე ბუნდესლიგის საუკეთესო ბომბარდირმა, ჰარი კეინმა, გოლად აქცია. ინგლისელმა მიმდინარე სეზონში მე-15 გოლი გაიტანა და დღეს ადრე დავაში წამოწეულ ომარ მარმუშს ისევ გაასწრო. მატჩი მხიარულ ნოტზე დასრულდა, ბორუსია ბოლომდე გაიხსნა, „რეკორდმაისტერი” კი სივრცეებში მომაკვდინებლად უტევდა, თუმცა მორიც ნიკოლასის გმირობებმა კინგსლი კომანსა და სერჟ გნაბრის არ გაატანინა.
საბოლოოდ, მატჩი კომპანის გუნდის გამარჯვებით დასრულდა. 16 ტურის თავზე ბავარიულ გრანდს 39 ქულა აქვს და უახლოეს მდევარ ლევერკუზენის ბაიერს 4 ქულით უსწრებს. 15 იანვარს ბუნდესლიგის მომდევნო ტურში მათი მეტოქე ჰოფენჰაიმი იქნება. შეხვედრა ალიანც არენაზე გაიმართება.
