დადასტურებულად — არნე სლოტი ლივერპულის მთავარი მწვრთნელი აღარ არის! ნიდერლანდელ სპეციალისტს ამის შესახებ სულ რამდენიმე წუთის წინ აცნობეს, ხოლო მერსისაიდული კლუბი ოფიციალურ განცხადებას უახლოეს წუთებში გაავრცელებს.
გავლენიანი ბრიტანული გამოცემები ბოლო რამდენიმე თვის განმავლობაში აქტიურად წერდნენ, რომ ლივერპული არნე სლოტის გათავისუფლების შესაძლებლობას სერიოზულად განიხილავდა. არსებობდა ვარაუდიც, რომ ნიდერლანდელ მწვრთნელს კიდევ ერთ შანსს მისცემდნენ, თუმცა, როგორც ჩანს, კლუბის ხელმძღვანელობამ საბოლოოდ მისი გუნდიდან გაშვების გადაწყვეტილება მიიღო.
არნე სლოტი ლივერპულის მთავარი მწვრთნელი 2024 წელს გახდა. მისი ხელმძღვანელობით ენფილდის ბინადრებმა 113 მატჩი ჩაატარეს, საიდანაც 66 მოიგეს, 18 ფრედ დაასრულეს, ხოლო 29-ჯერ დამარცხდნენ. ამ დროში ლივერპულმა პრემიერ ლიგის მოგებაც მოახერხა.
ბრიტანულ მედიაში გავრცელებული ინფორმაციით, არნე სლოტის მთავარი შემცვლელი დიდი ალბათობით ანდონი ირაოლა იქნება, რომელმაც ბორნმუთი დატოვა.
