მანჩესტერ იუნაიტედში ბევრი პრობლემაა და გულშემატკივრების აზრით, ერთ-ერთი უმთავრესი არის შეტევაში ლიდერის არყოფნა. უკანასკნელი 10 წლის მანძილზე "წითელი ეშმაკების" წინახაზში ვიხილეთ არაერთი ვარსკვლავური წინახაზელი, მაგრამ ქომაგთა იმედების გამართლება ბოლომდე ვერავინ მოახერხა.
"მანკუნიანელთა" გულშემატკივრები თვლიან, რომ მათ შეტევაში რაიან გიგზის მსგავსი ფეხბურთელი სჭირდებათ. ლეგენდარულმა გარემარბმა მთელი თავისი 24-წლიანი კარიერა დაუთმო სწორედ სერ ალექს ფერგიუსონის გუნდს და თავის ანგარიშზეც არაერთი რეკორდი მიითვალა. უელსელმა ვინგერმა "ოცნებათა თეატრში" ჩაატარა 963 მატჩი და გაიტანა 168 ბურთი.
ამის გარდა, მანჩესტერის ლეგენდარულმა გარემარბმა თავის გუნდთან ერთად 35 ტიტული მოიგო. როდესაც ვსაუბრობთ მის შესახებ, აუცილებლად უნდა გავიხსენოთ ზინედინ ზიდანის ცნობილი ფრაზა: "გიგზი რომ ფრანგი ყოფილიყო, მე ან პირესი სათადარიგოთა სკამზე ვიჯდებოდით", - განაცხადა მადრიდის რეალის ლეგენდარული გამთამაშებელი.
ასევე შეგვიძლია გავიხსენოთ ალესანდრო დელ პიეროს სიტყვებიც - "დავასახელებ ორ ფეხბურთელს, რომლის თამაშის ყურებისას ვტიროდი - მარადონა და გიგზი", - განაცხადა იტალიელმა ყოფილმა ფორვარდმა.
