საქართველოს მოქმედმა ჩემპიონმა იბერიამ ისტორია დაწერა და ევროტურნირების ჯგუფის საგზური გაინაღდა, თუმცა რომელი ტურნირის, ეს ჯერ უცნობია.
ევროპა ლიგის ფლეი-ოფში იბერია პოლონურ იეგალონიას დაუპირისპირდება, გამარჯვების შემთხვევაში ევროპა ლიგაზე ითამაშებს, მარცხის შემთხვევაში კი კონფერენს ლიგაზე.
სად უკეთესია იბერიასთვის თამაში ევროპა ლიგაზე თუ კონფერენს ლიგაზე? - მოგეხსენებათ, კლუბების დონით და რანგით ევროპა ლიგა კონფერენს ლიგაზე მაღალი ტურნირია.
ევროპა ლიგაზე თამაში იბერიასნაირი კლუბისთვის ბევრად მომგებიანი იქნება როგორც ფინანსურად, ისე ქართული საკლუბო ფეხბურთის რეიტინგში წინსვლისთვის.
კონკრეტულად, ევროპა ლიგის ძირითად ფაზაში გასვლისთვის იბერია უეფასგან გარანტირებულ 4.31 მილიონ ევროს მიიღებს. თითო მოგებაზე დამატებით 450 ათას ევროს, ფრეზე კი 150 ათას ევროს.დამატებით მიიღებს თანხას ლიგის ეტაპზე დაკავებული ადგილის მიხედვით — დაახლოებით €75,000-დან €2.7 მილიონამდე.
ასევე ექნება Value Pillar-ის შემოსავალი, რომლის ოდენობაც დამოკიდებულია საქართველოს სატელევიზიო ბაზარსა და კლუბის UEFA-ს კოეფიციენტზე.
იბერიას ჯგუფში შესვლამ საკლუბო რეიტინგში წინ უკვე წაგვწია და 50-ე ადგილზე გადავინაცვლეთ, მთავარ ეტაპზე კი ყოველ მოგებულ მატჩსა და ქულაზე კოეფიციენტი მოგვემატება, რაც რეიტინგში კიდევ უფრო წინ წაგვწევს.
თუ იბერია კონფერენს ლიგის ლიგის ეტაპზე გავა, მონაწილეობისთვის გარანტირებულად €3.17 მილიონს მიიღებს. თითო მოგების პრემია 400 ათასი ევრო იქნება, ფრე 133 ათასი ევრო, ფლეი-ოფში გასვლის შემთხვევაში კი დამატებითი პრემიები.
მოკლედ რომ ვთქვათ, კონფერენს ლიგის ძირითადი ეტაპი იბერიას მინიმუმ €3.17 მილიონს აძლევს, რაც ევროპა ლიგის €4.31 მილიონზე დაახლოებით €1.14 მილიონით ნაკლებია. ფინანსური და სარეიტინგო პროგრესის გარდა, არის პრესტიჟი, როცა იბერია ევროპის საშუალოზე მაღალი დონის კლუბებში გაერევა და მათ წინააღმდეგ მოუწევს თამაში.
