საბერძნეთის გზა ერთა ლიგის ფინალამდე
მოახლოებული ევროპის ჩემპიონატის საკვალიფიკაციო რაუნდის ფარგლებში, საბერძნეთმა ვერ მოახერხა ჯგუფური ეტაპის დაძლევა, რის შედეგადაც დღის წესრიგში დადგა გეგმა "ბ", კონტინენტის პირველობაზე გასვლა ერთა ლიგის გავლით. ევრო 2024-ის შესარჩევში ელადელებს საფრანგეთმა და ნიდერლანდელებმა აჯობეს.
რაც შეეხება ერთა ლიგას, "მეკობრეებმა" უმარტივესად გადალახეს კოსოვოს, ჩრდილოეთ ირლანდიისა და კვიპროსის ბარიერი - ექვსი შეხვედრა, ხუთი მოგება და მხოლოდ ერთი წაგება, მეზობელ კვიპროსთან, ისიც მაშინ, როდესაც "ლურჯ-თეთრების" პირველადგილოსნობას აღარაფერი ემუქრებოდა. რაც შეეხება ბურთების შეფარდებას, 10 გატანილი და მხოლოდ 2 გაშვებული.
როგორც ვხედავთ, გუსტავო პოიეტის შეგირდებმა ჯგუფური ეტაპი მართლაც დამაჯერებლად გადალახეს, ისევე როგორც ნახევარფინალური სტადია, რომელზეც ყაზახეთი გაანადგურეს, ანგარიშით 5:0. საბერძნეთს ევრო 2024-ზე გასვლამდე ერთი ნაბიჯი აშორებს, ისევე როგორც "ჯვაროსნებს", რომლებმაც პლეი-ოფში ლუქსემბურგს აჯობეს.
საქართველო - საბერძნეთის ურთიერთშეხვედრების ისტორია
როგორც აღვნიშნეთ, საქართველოსთვის საბერძნეთი ერთ-ერთი ყველაზე უხერხული მოწინააღმდეგეა. თავად განსაჯეთ, ცხრა შეხვედრა - შვიდჯერ იმარჯვეს ელადელებმა, ორი მატჩი კი ფრედ დასრულდა. ბურთების შეფარდება, 17:6, ალბათ რთული გამოსაცნობი არ არის, თუ რომელმა ნაკრებმა გაიტანა 17 ბურთი და რომელმა 6.
აღსანიშნავია, რომ "მეკობრეებმა" პირველი ხუთი შეხვედრიდან თითოეულ მათგანში იმარჯვეს. ერთგვარი "გამონათება" მოხდა მეექვსე შეხვედრაში, 2010 წლის 3 სექტემბერს, ევრო 2012-ის შესარჩევზე, როდესაც ალექსანდრე იაშვილის მე-3 წუთზე გატანილ ბურთს, ნიკოლაუს სპიროპულოსმა 72-ე წუთზე უპასუხა. შედეგად, 1:1 პირეოსში.
შემდეგ იყო კიდევ მარცხი, ასევე ევროპის 2012 წლის ჩემპიონატის საკვალიფიკაციო ეტაპზე და იმის მერე, ჩვენი ნაკრებისა და "ლურჯ-თეთრების" გზები 10 წლის მანძილზე არ გადაკვეთილა. 2021 წლის 31 მარტი: მეორე "გამონათება", ოთარ კაკაბაძის ავტოგოლი და ხვიჩა კვარაცხელიას სოლო რეიდი საბერძნეთის საჯარიმოში. შედეგად, სტუმრად დაფიქსირებული მორიგი 1:1. იმის შემდეგ ჩვენთვის სამწუხარო 0:2 იყო.
საბერძნეთის ნაკრების ფეხბურთელები, შემადგენლობა და ამჟამინდელი მდგომარეობა
საბერძნეთი ვარსკვლავებით სავსე გუნდი არასდროს ყოფილა. მათთვის ტრიუმფალურ 2004 წლის ევროპის ჩემპიონატზეც კი შემადგენლობის ძირითად ბირთვს წარმოადგენდნენ ობიექტურად საშუალო დონის მოთამაშეები, რომლებიც ერთობლივი ძალებით განსაკუთრებულ მექანიზმს ქმნიდნენ. ელადელებს მსგავსი მიდგომა დღემდე აქვთ.
თუ მაინც მივიდა საქმე ფეხბურთელების გამორჩევამდე, შეგვიძლია დავასახელოთ ლივერპულის მარცხენა მცველი, კონსტანტინოს ციმიკასი და ალკმაარის ფორვარდი, ვანგელის პავლიდისი, რომელთა სატრანსფერო ფასი 22 მილიონია, სწორედ ეს ორი მოთამაშეა "მეკობრეთა" შემადგენლობაში ყველაზე ძვირადღირებული.
ასევე, გამოსარჩევია ვესტ ჰემის ცენტრალური მცველი, კონსტანტინოს მავროპანოსი, კალიარის უკანახაზელი, პანტელის ჰაციდიაკოსი და ნოტინგემ ფორესტის კარის დარაჯი, ოდისეას ვლაჰოდიმოსი. თუ ახალგაზრდა ტალანტებზე მიდგა საქმე, შეგვიძლია დავასახელოთ პაოკის 21 წლის გამთამაშებელი, გიანის კონსტანტელიასი.
ისევე როგორც ევროპის 2004 წლის ზღაპრულ ჩემპიონატზე, ასე არის ახლაც - "ლურჯ-თეთრების" წარმატებაში უდიდეს როლს მთავარი მწვრთნელი თამაშობს. მაშინ, საბერძნეთს მეთაურობდა ოტო რეჰაგელი, დღეს - გუს პოიეტი. მართალია, ის არ არის ისეთი ლეგენდარული, როგორიც მისი წინამორბედი, მაგრამ ფაქტია, ურუგვაელი დამრიგებლის ხელში, ელადელები თანამედროვე სტილში თამაშობენ.
"მეკობრეებს" არ აქვთ ერთი გამოკვეთილი ტაქტიკა, ისინი თითოეულ მოწინააღმდეგეს უდგებიან ინდივიდუალურად. ამის მიუხედავად, ერთი დამახასიათებელი ნიშანი "ლურჯ-თეთრებს" მაინც აქვთ: მაღლა აწეული დაცვის ხაზი და შეტევაში აქტიურად ჩართული განაპირა მცველები. ზონების გადაკეტვა და პრესინგი, ეს ყველაფერიც არის პოიეტის გუნდის არსენალში, რომელსაც უდიდესი ალბათობით, "ჯვაროსნებთან" მატჩშიც გამოიყენებენ.
