“დინამო თბილისი” კონფერენს ლიგის მეორე საკვალიფიკაციო ეტაპის მატჩისთვის ემზადება, თბილისელები 23 ივლისს მიხეილ მესხზე ვილნიუსისჟალგირისს უმასპინძლებენ.
დღეს “დინამო თბილისის” მთავარმა მწვრთნელმა, თემურ ქეცბაიამ მატჩისწინა პრესკონფერენციაზე ჟურნალისტების კითხვებს უპასუხა:
"უგრეხელიძე ვარჯიშობს და სათამაშოდ მზადაა, მაგრამ ვნახოთ, ხვალ სასტარტოში იქნება თუ არა. ის გუნდის ერთ-ერთი წამყვანი ფეხბურთელია.
საგოლე მომენტები უნდა გამოვიყენოთ. რაც უფრო შორს გადიხარ, უფრო ძლიერი მეტოქე გხვდება და ამ პრობლემის მოგვარება მნიშვნელოვანია.
მეტოქეს ვაფასებთ, მაგრამ გვაქვს საშუალება, რომ მომდევნო ეტაპზე გავიდეთ. გუნდი მზადაა. ხვალინდელი თამაში უნდა მოვიგოთ. განმეორებითი მატჩი ხელოვნურ საფარზე იქნება, რასაც მიჩვეულნი არ ვართ.
“ჟალგირისს” ვიცნობთ. კარგი გუნდია. ჩემპიონატში მაღალ პოზიციაზე არ არიან, მაგრამ სახლში მშვენივრად თამაშობენ. მოუმზადებელნი ნამდვილად არ იქნებიან.
ყველაფერს გავაკეთებთ, რომ მოვიგოთ. იმედია, სტადიონზე გულშემატკივრები მოვლენ.
რაც შეეხება თორნიკე კვარაცხელიას, წინა თამაშში ვნახეთ, რომ შეცვლაზე შემოსულები თამაშში კარგად ჩაერთნენ და შემდეგ ეტაპზე გასვლა მოვახერხეთ. დაიწყებს თუ არა მატჩს სასტარტო შემადგენლიბიდან? ჩვენ ვფიქრობთ და ხვალ ნახავთ.
ცოტა ხნის წინ უცხოელი ფეხბურთელები ჩამოვიყვანეთ. ქართველებთანაც გვქონდა მოლაპარაკებები, მაგრამ შეთანხმება ვერ მოხერხდა. ახლაც ძალიან ბევრი ახალგაზრდა ქართველი გვყავს და კარიერის მიწურულს მყოფი მოთამაშეების შეძენა არ გვსურს.
პრესკონფერენციაზე ჟურნალისტების რაოდენობა მახარებს, ასეთი რამ ნაკრებში მუშაობის დროსაც არ მახსოვს, მაგრამ კარგი იქნება, რომ ხალხი სტადიონზეც მოვიდეს. ჩემპიონატშიც ფული უნდა ჩაიდოს, რომ გუნდები გაძლიერდნენ. მეტი უნდა ვილაპარაკოთ ფეხბურთზე და მატჩები უფრო ხშირად გაშუქდეს. ვფიქრობ, ფეხბურთის პოპულარიზაცია იმ დონეზე არაა, რა დონეზეც უნდა იყოს, რაც სამწუხაროა.
ამ მატჩში ახალწვეულები ვერ დაგვეხმარებიან, რადგან ბევრი გაუცდათ. დიდი ხანი ისვენებდნენ და ერთ კვირაში მომზადებას ვერ მოასწრებენ.
მადლობა კლუბის ხელმძღვანელობას, რომ ხელს გვიწყობენ. კარგია, რომ ჩემპიონატში სხვაობა შევამცირეთ. ჩემპიონობა გვინდა. დინამო თბილისი კუთვნილ ადგილს უნდა დაუბრუნეს.
წინა მატჩში შეცვლაზე შემოსულმა ფეხბურთელებმა კარგი შთაბეჭდილება დატოვეს, რაც სასიამოვნოა.
მათე ვაწაძეს გუშინაც არ უვარჯიშია. ჩემპიონობისთვის რომ ვიბრძვით, მისი დიდი დამსახურებაა, ძალიან ბევრი გოლი გაიტანა. მათეს როგორც მოედანზე, ისე მის მიღმა დიდი როლი აქვს და მიხარია, რომ ასეთი ფეხბურთელი გვყავს. ვნახოთ, ხვალ ითამაშებს თუ არა.
წინასწარ გადავწყვიტეთ, რომ პენალტს ან მათე დაარტყამდა, ან ბა. მოედანზე ეს უკანასკნელი იყო და სწორედ ამიტომ დაარტყა. რომ მცოდნოდა, რომ გააფუჭებდა, რა თქმა უნდა, გადაწყვეტილებას შევცვლიდი (იცინის)", - განაცხადა ქართველმა სპეციალისტმა.
დინამო თბილისი- ჟალგირისის მატჩი 23 ივლისს, მიხეილ მესხზე 21:00 საათზე დაიწყება.
