წითელი ეშმაკების ახალი მთავარი მწვრთნელის რუბენ ამორიმის მთავარი მოთხოვნა სწორედ კვარაცხელიას ყიდვაა და კლუბი მზადაა მის სანაცვლოდ 90 მილიონი ფუნტი გადაიხადოს.
ჭორია თუ სიმართლე? - LaGazzetta.ge-ს ინფორმაციით ამ ეტაპზე კვარას მანჩესტერში ტრანსფერზე მოლაპარაკებები საერთოდ არ მიმდინარეობს. ამორიმის ახალ კლუბთან ერთად ერთი მატჩიც არ ჩაუტარებია და ჯერჯერობით, მას სხვა საფიქრალი აქვს - დაალაგოს ამჟამინდელი გუნდი და "ჭაობიდან" ამოიყვანოს.
რა თქმა უნდა, ისეთი დიდი გუნდი, როგორიც მანჩესტერია, სამომავლო პერსპექტივისთვის ამა თუ იმ ფეხბურთელის ყიდვას განიხილავს, მაგრამ ეს ჯერ მხოლოდ დაკვირვების დონეზეა.
თავის მხრივ, სხვა ფიქრებშია კვარაცხელიას მხარეც. ნაპოლის ხელმძღვანელობა და ფეხბურთელის აგენტები ახალ კონტრაქტზე მოლაპარაკებებს უკვე რამდენიმე თვეა აწარმოებენ. ამასთანავე, ზაფხულში კვარას ერთი სარფიანი შეთავაზება პსჟ-დან უკვე ჰქონდა, რომელიც ნაპოლიმ დაბლოკა, თუმცა პსჟ-ს კვარა მიზანში კვლავ ჰყავს ამოღებული და გაჩერებას არ აპირებს.
შესაბამისად, ინფორმაცია იმის შესახებ, რომ მანჩესტერის მთავარ მწვრთნელს კვარაცხელიას ყიდვა უნდა და მის სანაცვლოდ 90 მილიონის გადახდას აპირებენ, ამ ეტაპზე სიმართლეს არ შეესაბამება.
იხილეთ ჩვენი პოდკასტის მორიგი ეპიზოდი
