ჩემპიონთა ლიგის მატჩის დღე: ყველაფერი, რაც ბოლო ტურის შესახებ უნდა ვიცოდეთ

ჩემპიონთა ლიგის ფაზა მიუახლოვდა თავის კულმინაციას - მერვე ტური, შემდეგ კი პლეიოფები. განვიხილოთ ყველაფერი ის, თუ რა არის გარკვეული ამ დროისთვის და რა არის ჯერ კიდევ გასარკვევი.

ჩემპიონთა ლიგის ფაზის მერვე ტურისთვის გვხვდება ცხრა გუნდი, რომელმაც მერვედფინალში გასვლის თეორიული შანსიც დაკარგა. ესენი არიან - ბოლონია, სპარტა, ლაიფციგი, ჟირონა, ცრვენა ზვეზდა, შტურმი, ზალცბურგი, სლოვანი და იანგ ბოიზი. აღნიშნულ გუნდებს ევროპის ყველაზე პრესტიჟულ საკლუბო ტურნირზე წელს ვეღარ ვიხილავთ.

რაც შეეხება მათ, ვინც მერვედფინალში გასვლის საგზური უკვე გაიფორმეს - ლივერპული და ბარსელონა. ცხრა უკვე გავარდნილი და ორი მერვედფინალში გასული გუნდის გარდა, გვხვდება 25 კლუბი, რომელიც შემდეგ ეტაპზე გასვლისთვის იბრძოლებს. როგორი გასაკვირიც არ უნდა იყოს, საუკეთესო 24 წარმომადგენელს შორის ჯერ კიდევ არ არის მანჩესტერ სიტი.

ჩემპიონთა ლიგაზე ჩატარებული შვიდი შეხვედრის შემდეგ, "ქალაქელები" რვა ქულით 25-ე ადგილზე არიან. მათი მოწინააღმდეგე ბოლო ტურში იქნება მე-20 ადგილოსანი ბრიუგე, რომელიც პლეიოფში გასვლისთვის ასევე იბრძვის. "ლურჯებს" სჭირდებათ მხოლოდ მოგება, წინააღმდეგ შემთხვევაში ისინი 24-ეულს მიღმა დარჩებიან.

პლეიოფის გარეშე, მერვედფინალში გადის პირველი რვა საუკეთესო გუნდი და ამ მხრივ გარკვეული ჯერჯერობით ასევე არაფერია. როგორც აღვნიშნეთ, მშვიდად ყოფნა შეუძლიათ მხოლოდ მერსისაიდელებსა და კატალონიელებს, რომლებიც 8 საუკეთესოდან ვეღარ ამოვარდებიან. რაც შეეხებათ მათ მეტოქეებს: "წითლები" ესტუმრებიან მე-19 პოზიციაზე მყოფ პსვ ეინდჰოვენს, "ბლაუგრანა" კი მე-7 ადგილზე მყოფ ბერგამოს ატალანტას მიიღებს.

რვა საუკეთესო გუნდს შორის მყოფი სხვა წარმომადგენლების შეხვედრები - არსენალი ესტუმრება უმოტივაციო ჟირონას, ინტერი მიიღებს მე-10 პოზიციაზე მყოფ მონაკოს, ატლეტიკოს მეტოქე იქნება ასევე უმოტივაციო ზალცბურგი, მილანი მიიღებს 26-ე ადგილზე მყოფ დინამო ზაგრებს, ლევერკუზენს ელის უმოტივაციო სპარტა, "ლა დეას" შესახებ კი უკვე ვისაუბრეთ.

როგორც ვხედავთ, ბოლო ტურში გაუმართლათ ლონდონელებს, მადრიდელებსა და ბაიერს, რომლებსაც მოწინააღმდეგეებად ჰყავთ ისეთი გუნდები, რომლებმაც 1/8 ფინალში გასვლის თეორიული შანსიც კი დაკარგეს. დანარჩენ წყვილებში ყველა მოსაგებად ითამაშებს. იმის გათვალისწინებით, რომ ყველა მატჩი გაიმართება ერთ დროს, 23:55 საათზე, წინასწარ რაღაცის დაგეგმვა და განსაზღვრა შეუძლებელი იქნება.

მე-8 ადგილიდან 24-ე ადგილამდე სხვაობა არის 3 ქულა, რაც ნიშნავს იმას, რომ ამჟამად 8 საუკეთესო გუნდში მყოფი წარმომადგენლის მარცხის შემთხვევაში, ის 24-ეულიდან ვერ ამოვარდება, მაგრამ პლეიოფის თამაში მას მაინც მოუწევს. რაც შეეხებათ კლუბებს, რომლებიც აცხადებენ 24-ეულში შესვლის პრეტენზიას: სიტი (8 ქულა), დინამო ზაგრები (8 ქულა) და შახტარი (7 ქულა).

მანჩესტერული გუნდის გამარჯვების შემთხვევაში, ის დააგროვებს 11 ქულას, რაც პოტენციურად მე-19 - მე-20 ადგილზე გასვლის გარანტიას იძლევა. საინტერესოა, რომ "ქალაქელთა" მეტოქე ბრიუგე სწორედ 11 ქულით მე-20 პოზიციაზე არის. პრემიერ ლიგის მოქმედი ჩემპიონის გარდა, მიმოვიხილოთ სხვა ტოპ კლუბების მდგომარეობაც ბოლო ტურისთვის.

15-17 ადგილებზე, 12 ქულით ჩამწკრივებულია 3 გრანდი - მიუნხენის ბაიერნი, ტურინის იუვენტუსი და მადრიდის რეალი. რაც შეეხებათ მათ მეტოქეებს - "რეკორდმაისტერი" მიიღებს უმოტივაციო სლოვანს, "ბებერი ქალბატონი" 21-ე პოზიციაზე მყოფ ლისაბონის ბენფიკას, "სამეფო კლუბი" კი ესტუმრება სეზონის მთავარ აღმოჩენას, მე-13 ადგილზე მყოფ ბრესტს.

როგორც ვხედავთ, ბავარიული გუნდისგან განსხვავებით, "ბიანკონერი" და "ბლანკოსი" მართლაც რთული გამოცდის წინაშე არიან. ბოლოს კი ქართველი მაყურებლისთვის მთავარი: პარის სენ-ჟერმენის მდგომარეობა. ფრანგული კლუბი 10 ქულით იმყოფება 22-ე პოზიციაზე, მეტოქე კი 24-ე ადგილზე მყოფი შტუტგარტია, რომელსაც ასევე 10 ქულა აქვს.

როგორც ვიცით, პსჟ-ს ვერ დაეხმარება ხვიჩა კვარაცხელია, რადგან გუნდებს მერვედფინალურ სტადიამდე ახალი ფეხბურთელების განაცხადში დარეგისტრირების უფლება არ აქვთ. პარიზელებს ქართველი ვინგერის გარეშე მოუწევთ მოგებაზე ფიქრი. დიახ, მხოლოდ მოგება, რადგან ფრე ან მითუმეტეს წაგება, "ლურჯ-წითლებისთვის" შესაძლოა დამღუპველი იყოს.