მსოფლიო რაგბის მიერ ორგანიზებულ ახალ ტურნირზე საქართველოს ნაკრებმა ზედიზედ მესამე მატჩი მოიგო და ზაფხულის ტესტები გამარჯვებების სერიით დაასრულა.
ერთა თასის ზაფხულის ტურნეს მესამე შეხვედრაში, საქართველოს მორაგბეთა ეროვნული ნაკრები ჩილეს დაუპირისპირდა და როგორც მოსალოდნელი იყო მეტოქე დამაჯერებლად, 49-22 დაამარცხა.
ბორჯღალოსნებმა აღნიშნულ შეხვედრაში 6 ლელო დადეს და ერთიც საჯარიმო ლელო მოიპოვეს. ჩილეს ნაკრები ორჯერ ჯინჭარაძემ, ხოლო თითოჯერ ჭუმბურიძემ, ივანიშვილმა, შვანგირაძემ და იაშაღაშვილმა დაალელოვეს.
ამრიგად, მსოფლიო რაგბის ერთა თასის ივლისის მატჩებში ბორჯღალოსნებმა უდანაკარგოდ იასპარეზეს. ჩილეს ნაკრები გარდა, ქართველმა მორაგბეებმა ურუგვაი და სამოა დაამარცხეს.
