ჩემპიონთა ლიგის მეორე საკვალიფიკაციო ეტაპის პირველი მატჩი მიხეილ მესხის სტადიონზე გაიმართა, სადაც მაყურებელმა იბერია 1999-სა და სლოვან ბრატისლავას დაპირისპირება იხილა. იმის მიუხედავად, რომ თბილისურმა კლუბმა არც ისე ცუდი პერფორმანსი აჩვენა, გამარჯვება მაინც სტუმარ გუნდს დარჩა, 0-2.
მატჩის შემდეგ სლოვან ბრატისლავას მთავარმა მწვრთნელმა, იაია ტურემ პრესკონფერენციზე საინტერესო კომენტარი გააკეთა.
"მეორე ტაიმში გაგვიჭირდა, მაგრამ მეტოქეს სივრცეები არ მივეცით, თამაში გავაკონტროლეთ და ამით კმაყოფილი ვარ. სადებიუტო მატჩში ჩემი გუნდის დამოკიდებულებით ბედნიერი ვარ. რა თქმა უნდა, პროგრესი გვმართებს და მუშაობას გავაგრძელებთ. თავი კარგად დავიცავით. ასეთ შეხვედრაში კარის მშრალად შენახვა მარტივი არაა.
თამაშის ხარისხით გაოცებული არ ვარ, მაგრამ რამდენიმე მნიშვნელოვანი ფეხბურთელები გვაკლდა. თუმცა, აღსანიშნავია, რომ გუნდურად ვითამაშეთ. ეს ორმატჩიანი დაპირისპირებაა. განმეორებით მატჩში ხარვეზები უნდა გამოვასწოროთ. გარკვეულ მომენტებში ზედმეტად დაცვითი ფეხბურთი ვაჩვენეთ. იბერია კარგი გუნდია. მათ ფლორას მოუგეს და ჩვენი გაბრაზებაც შეუძლიათ. რთულ მატჩს ველოდები. არ მივიჩნევ, რომ ყველაფერი დასრულებულია.
მხოლოდ 1 თვეა, რაც ამ გუნდში მოვედი. ჩემი იდეების დანერგვას დრო დასჭირდება. ფეხბურთელები მოწადინებულნი არიან. მინდა, მეორე მატჩიც მოვიგოთ."
გუნდებს შორის განმეორებითი მატჩი 29 ივლისს, თბილისის დროით 22:15 საათზე გაიმართება.
