ჩემპიონთა ლიგის მეორე საკვალიფიკაციო ეტაპის პირველი მატჩი მიხეილ მესხის სტადიონზე გაიმართა, სადაც მაყურებელმა იბერია 1999-სა და სლოვან ბრატისლავას დაპირისპირება იხილა. იმის მიუხედავად, რომ თბილისურმა კლუბმა არც ისე ცუდი პერფორმანსი აჩვენა, გამარჯვება მაინც სტუმარ გუნდს დარჩა, 0-2.
მატჩის შემდეგ იბერიას მთავარმა მწვრთნელმა, ანდრეი დემჩენკომ პრესკონფერენციზე საინტერესო კომენტარი გააკეთა.
"სლოვანი ძლიერი და ორგანიზებული გუნდია, მაგრამ ჩვენ რესურსი გვაქვს, რომ ასეთ მეტოქეს მოვუგოთ. ვფიქრობ, პირველი გოლი არ უნდა ჩათვლილიყო, რადგან მეკარე იბლოკებოდა. მეორე გოლზე კი დაცვაში შეცდომა დავუშვით.
ჩემმა ფეხბურთელმა მითხრა, რომ მასზე დაჯარიმდნენ და პენალტი უნდა დანიშნულიყო. თუ ეს მართლია, სამწუხაროა, რომ ჩემპიონთა ლიგის საკვალიფიკაციო ეტაპზე მსაჯი შეცდა.
ერთი გოლი მაინც რომ გაგვეტანა, მეორე მატჩში უფრო ოპტიმისტურად ვიქნებოდით განწყობილნი. უამრავი პრეცედენტი არსებობს, რომ გუნდმა პირველი შეხვედრის წაგების შემდეგ დააქამბექა. სწორი დასკვნები უნდა გამოვიტანოთ და გვჯეროდეს, რომ შანსი ჯერ კიდევ გვაქვს.
აზერბაიჯანის ჩემპიონატიდან 3 ფეხბურთელი დავიმატეთ. უახლოეს მომავალში ისინი დაგვეხმარებიან."
გუნდებს შორის განმეორებითი მატჩი 29 ივლისს, თბილისის დროით 22:15 საათზე გაიმართება.
