ჩემპიონთა ლიგის მეორე საკვალიფიკაციო ეტაპის პირველი მატჩი მიხეილ მესხის სტადიონზე გაიმართა, სადაც მაყურებელმა იბერია 1999-სა და სლოვან ბრატისლავას დაპირისპირება იხილა. იმის მიუხედავად, რომ თბილისურმა კლუბმა არც ისე ცუდი პერფორმანსი აჩვენა, გამარჯვება მაინც სტუმარ გუნდს დარჩა, 0-2.
მატჩის შემდეგ იბერიას კაპიტანმა, გიორგი ჯინჯოლავამ პრესკონფერენციზე საინტერესო კომენტარი გააკეთა.
"მინდა, ქომაგებს მადლობა ვუთხრა. მატჩს დადებითად ვერ შევაფასებ, რადგან 0-2 წავაგეთ, მაგრამ ბურთს ვფლობდით. მსაჯმაც შეცდომები დაუშვა.
ფინიშინგზე და სხვა ყველაფერზე მუშაობას გავაგრძელებთ. მატჩის სტარტზევე ვიგრძენით, რომ ნებისმიერი მეტოქისთვის შეგვიძლია წინააღმდეგობის გაწევა.
როდესაც იცი, რომ აქედან გამოვარდნის შემთხვევაში კონფერენს ლიგაზე გადაერთვები, ეს სიმშვიდეს გაძლევს, მაგრამ ამაზე არ გვიფიქრია და არც ხელი შეუშლია.
10 წუთში ორი გოლის გაშვება სამწუხარო იყო, რადგან მეტოქეს ვჯობდით. თანაც, მეორე გოლი ისეთი იყო, როგორიც იშვიათად გადის."
გუნდებს შორის განმეორებითი მატჩი 29 ივლისს, თბილისის დროით 22:15 საათზე გაიმართება.
