ლუის დე ლა ფუენტე - მწვრთნელი, ვის ხელშიც არაერთმა ცნობილმა სპეციალისტმა გაიარა. საქმე ისაა, რომ ევროპის ჩემპიონი დამრიგებელი სხვადასხვა დროს მუშაობდა უეფას სისტემასა და ესპანეთის ფეხბურთის ფედერაციაში, მისი მოვალეობა კი სწორედ ახალგაზრდა თავკაცთა მომზადება იყო.
ესპანელი მწვრთნელის მოსწავლეები იყვნენ ჩაბი ალონსო, ანდონი ირაოლა, რაულ გონსალესი, ლიონელ სკალონი, ჩავი ერნანდესი და სხვები. "ფურია როხას" ამჟამინდელ დამრიგებელს თითოეულ მათგანთან აკავშირებს განსაკუთრებული მოგონება, ყველაზე მეტად კი ის მაინც არგენტინელ სპეციალისტს გამოარჩევს.
"მქონდა იმის ბედნიერება, რომ ვყოფილიყავი ალონსოს, ჩავისა და რაულის მასწავლებელი. ისინი არიან ლეგენდარული ფეხბურთელები, ვინც დამრიგებლობაც შეითავსეს. ვაფასებ თითოეულ მათგანს, მაგრამ ყველაზე განსაკუთრებული ურთიერთობა მაინც სკალონისთან მაქვს. ის საოცარი პიროვნებაა.
ლიონელი არის მსოფლიო ჩემპიონი მწვრთნელი, ვინც ახალ მწვერვალებს იპყრობს. არ ვეთანხმები მოსაზრებას, რომ მან ამ ყველაფერს მიაღწია იღბალით, არგენტინელი სპეციალისტის წარმატება მის პროფესიონალიზმს უკავშირდება. დარწმუნებული ვარ, ის კიდევ ბევრს მიაღწევს", - განაცხადა 65 წლის დამრიგებელმა.
როგორ მოხდა მათი გაცნობა? 2015 წელს, საფეხბურთო კარიერის დასრულების შემდეგ, არგენტინის ნაკრების ამჟამინდელი მწვრთნელი დაბინავდა მალიორკაზე, სადაც ახალი კარიერა ბავშვთა ფეხბურთში მუშაობით დაიწყო. სკალონი მუშაობდა სან-კალიუში, პარალელურად კი ლიცენზიის მისაღებად ის გადიოდა კურსებს და მისი დამრიგებელი სწორედ დე ლა ფუენტე იყო.
