მონჟუიკზე ანგარიში მე-4 წუთზე გაიხსნა. კუთხურიდან ჩამოწოდებულ ბურთს სერხიო გონსალესი დაუხვდა და ინაკი პენიას თავურით გაუტანა. პირველი ტაიმის განმავლობაში ბარსელონას აშკარა საგოლე მომენტი რამდენჯერმე ჰქონდა, თუმცა ლეგანესი ყოველ ჯერზე მარკო დმიტროვიჩმა იხსნა.
მეორე ტაიმი ჰანსი ფლიკის გუნდმა აქტიურად დაიწყო. განსაკუთრებულად აქტიურობდნენ რობერტ ლევანდოვსკი და ლამინ იამალი, თუმცა მათი შეტევები გოლით არცერთ შემთხვევაში არ დასრულებულა. შეხვედრის ბოლო 20-25 წუთის განმავლობაში ბორხა ხიმენესის ლეგანესი ანგარიშის შენარჩუნებას ყველაფრის ფასად ცდილობდა და სათამაშო რესურსს მთლიანად საკუთარი საჯარიმოს გამაგრებაში ხარჯავდა, ამან ბარსელონას მთელი შემტევი პოტენციალის მობილიზების საშუალება მისცა, თუმცა მსაჯის სასტვენამდე აღარაფერი შეცვლილა.
ამ შედეგით ბარსელონას ესპანეთის ჩემპიონატის ცხრილში აქტივი არ მოჰმატებია და კვლავ 38 ქულა აქვს, გუნდი ისევ პირველ პოზიციაზეა, თუმცა უნდა გვახსოვდეს, რომ უახლოეს მდევრებს, ასევე 38-ქულიან ატლეტიკოს და 37-ქულიან რეალს „ბლაუგრანასთან” შედარებით ერთი მატჩით ნაკლები აქვთ ჩატარებული.
მომდევნო შეხვედრას ბარსელონა 22 დეკემბერს 00:00-ზე სწორედ უშუალო კონკურენტ ატლეტიკოსთან გამართავს. კატალონიური გრანდი დღევანდელის მსაგსად ამ თამაშშიც მასპინძელი იქნება.
