ჩემპიონთა ლიგის პირველ საკვალიფიკაციო ეტაპზე საქართველოს მოქმედი ჩემპიონი იბერია ესტონეთის ჩემპიონ ფლორას დაუპირისპირდა და სტუმრად 2:3 დაამარცხა. განმეორებით მატჩი 14 ივლისს, თბილისში შედგება და დადებითი შედეგის მიღწევის შემთხვევაში, იბერია ამ უძლეველ ეტაპს გადალახავს.
უძლეველი იმიტომ რომ, უკვე 7 წელია ქართული კლუბი ჩემპიონთა ლიგაზე პირველ ეტაპსაც ვერ გადის და ეგრევე ეთიშება ასპარეზობას. ბოლოს, პირველი ეტაპი 2019 წელს გადავლახეთ, ეს მაშინაც იბერიამ (მაშინდელმა საბურთალომ) შეძლო, როცა მოლდოვის ჩემპიონი ტირასპოლის შერიფი დაამარცხა.
მეორე ეტაპზე იბერია უძლიერეს დინამო ზაგრებს დაუპირისპირდა და დამარცხდა, რის შედეგადაც ევროპა ლიგაზე გადაერთო. იბერიას მეტოქე არარატ არმენია იყო და ამ ბარიერის დაძლევის შემთხვევასი, თბილისელები ევროპა ლიგის ფლეი-ოფს ითამაშებდნენ.
იბერიამ სომხეთში მოიგო, თუმცა თბილისში სათანადოდ თავი ვერ წარმოაჩინა და ევროტურნირებიდან გავარდა.
რა სიტუაციაა წელს? - ალბათ, ევროტურნირების ჯგუფში შესვლის ასეთი შანსი ქართულ გუნდს არასდროს არ ჰქონია. ფლორას ბარიერის დაძლევის შემთხვევაში, იბერიას მეტოქე სლოვან ბრატისლავა იქნება.
პირველი ეტაპის გადალახვა ავტომატურად ნიშნავს მინიმუმ ევროპა ლიგის მესამე საკვალიფიკაციო ეტაპის და კონფერენს ლიგის ფლეი-ოფის საგზურს. შესაბამისად, თუ იბერია სლოვანის ბარიერს ვერ გადალახავს, მაინც ერთ ნაბიჯში იქნება ჯგუფურ ეტაპთან.
ხოლო თუ იბერიელებმა სენსაცია დააფიქსირეს და სლოვანიც დაამარცხეს, ავტომატურად მოხვდებიან ევროპა ლიგის ფლეი-ოფში და გარანტირებული ექნებათ კონფერენს ლიგის ჯგუფი.
შესაბამისად, ფლორასთან გამარჯვება ნიშნავს, რომ იბერია ძალიან ახლოს იქნება ქართველი გულშემატკივრის დიდხნიანი ოცნების ასრულებასთან და ევროტურნირების ჯგუფში შესვლასთან.
