ჩემპიონთა ლიგის 2026/2027 წლების სეზონის 36-ვე გუნდის ვინაობა ცნობილია. წილისყრა გაიმართება დღეს, ჩვენი დროით 20:00 საათზე. აღსანიშნავია, რომ ევროპის მთავარი საკლუბო ტურნირის შესარჩევი ტრადიციულად დატვირთული იყო სენსაციებით, მაგალითად: ფაზაში მოხვდა აზერბაიჯანული კლუბი, მაგრამ არა ყარაბაღი, ასევე ნორვეგიის 2 წარმომადგენელიც.
ბოდო/გლიმტი და უკვე ვიკინგიც
ბოდოს უკვე მივეჩვიეთ - ეს არის გუნდი, რომელმაც ჩემპიონთა ლიგის გასულ სეზონში დაამარცხა ინტერი, მანჩესტერ სიტი და ატლეტიკო. აღარავის უკვირს გლიმტის თამაში ევროპის მთავარ საკლუბო ტურნირზე, წელს კი ვიკინგ სტავანგერის სახით, ნორვეგიულ ფეხბურთს კიდევ 1 წარმომადგენელი ეყოლება.
ფენერბაჰჩეს დაბრუნება - პირველად 2008 წლის შემდეგ
ფენერბაჰჩე მუდმივად ტრიალებს თურქული ფეხბურთის ელიტაში, თუმცა როგორი გასაკვირიც არ უნდა იყოს, ჩემპიონთა ლიგაზე ამ გუნდს 2008 წლიდან არ უთამაშია. სტამბოლში იმ დროს კარიერის დასკვნით ეტაპს ატარებდა რობერტო კარლოსი, დამრიგებლად კი ლუის არაგონესი მუშაობდა. 18-წლიანი პაუზის შემდეგ, "იადონები" დაბრუნდნენ.
იაია ტურეს ბოლომდე მიყვანილი საქმე
როგორც გვახსოვს, ჩემპიონთა ლიგის საკვალიფიკაციო ეტაპის ადრეულ სტადიაზე მონაწილეობდა თბილისის იბერია 1999, რომელმაც ბრატისლავის სლოვანთან წააგო. "წითელი არწივების" შემდეგ, სლოვაკურმა გუნდმა მოუგო მიალბისა და სელიესაც, რითაც ევროპის მთავარ საკლუბო ტურნირზე თავისი ადგილი დაიკავა.
9 წლის წინ დაარსებული აზერბაიჯანული კლუბი ჩემპიონთა ლიგაზე
მთავარი სენსაციის ავტორი უდავოდ არის მასაზირის საბაჰი, რომელიც დაარსებიდან 9 წლის შემდეგ უკვე ჩემპიონთა ლიგაზე გავიდა. პირველად ევროპის მთავარი საკლუბო ტურნირის ისტორიაში, ფინალურ ეტაპზე ყარაბაღის გარდა სხვა აზერბაიჯანული გუნდი ითამაშებს.
ქართველები ჩემპიონთა ლიგაზე
ჩემპიონთა ლიგის ფაზის 2026/2027 წლების სეზონში ითამაშებს ოთხი ქართველი ფეხბურთელი - ხვიჩა კვარაცხელია (პარი სენ-ჟერმენი), გიორგი მამარდაშვილი (ლივერპული), გიორგი მიქაუტაძე (ვილიარეალი) და ირაკლი აზაროვი (შახტარი). საკმაოდ მაღალია იმის ალბათობა, რომ დონეცკელთა სეზონი გაგრძელდეს ქართველი განაპირა მცველის გარეშე, რადგან ის ახალი კლუბის ძიებაშია.
