ხვიჩა კვარაცხელია პარის სენ-ჟერმენის ფეხბურთელის რანგში ლიგა 1-ის ჩემპიონი უკვე გახდა და საინტერესოა, რომ მაისის ბოლომდე მას კიდევ 3 ტიტულის მოგება შეუძლია. 23 მაისს ნაპოლი იტალიის ჩემპიონატში გამართავს დასკვნით შეხვედრას და მილანის ინტერთან სხვაობის შენარჩუნების შემთხვევაში, სამხრეთული კლუბი სკუდეტოს მოიგებს.
ქართველმა გარემარბმა მიმდინარე სეზონის პირველი ნახევარი გაატარა "პარტენოპეიში", რაც ნიშნავს იმას, რომ საჩემპიონო გუნდის წევრი ისიც იქნება. 24 მაისს პსჟ-ს ვინგერს ელის საფრანგეთის თასის ფინალი, სადაც მისი გუნდის მეტოქე რეიმსი იქნება. როგორც ვხედავთ, პარიზელთა მე-7 ნომერმა 24 საათში შესაძლოა 2 ტიტული დაისაკუთროს.
ბოლოს კი მესამე, მთავარი - ჩემპიონთა ლიგის ფინალი, რომელიც 31 მაისს გაიმართება. ლუის ენრიკეს გუნდის მოწინააღმდეგე იქნება "ნერაძური", რომელიც როგორც აღვნიშნეთ, კალჩოში მარადონას ბინადრებს სკუდეტოსთვის ბრძოლაში ეცილება.
| თარიღი | მატჩი | ტურნირი |
| 23/05/2025 | ნაპოლი-კალიარი | სერია ა |
| 24/05/2025 | პსჟ-რეიმსი | საფრანგეთის თასის ფინალი |
| 31/05/2025 | პსჟ-ინტერი | ჩემპიონთა ლიგის ფინალი |
