2013 წლის გაზაფხული - ჯერ კიდევ მიუნხენის ბაიერნში მოთამაშე კროოსი ჩემპიონთა ლიგის ფინალში ამარცხებს როისის დორტმუნდის ბორუსიას და თავის კარიერაში ჩემპიონთა ლიგის პირველ თასს იგებს. ერთი წლის შემდეგ ის ხდება მუნდიალის ტრიუმფატორიც და პარალელურად მადრიდის რეალში გადასვლის დეტალებს ათანხმებს.
ფლორენტინო პერესი გერმანელი ნახევარმცველის ტრანსფერს "საუკუნის გარიგებას" უწოდებს, სატრანსფერო ღირებულებისა და მიღწეული შედეგების გათვალისწინებით. თავად განსაჯეთ: 25 მილიონად ნაყიდი შუახაზელი გახდება "სამეფო კლუბის" ისტორიაში ერთ-ერთი საუკეთესო მოთამაშე, რომელიც ჩემპიონთა ლიგის თასს თავის კარიერაში 5-ჯერ აღმართავს.
ცოტა ხანში კი ტონი ითამაშებს თავის მორიგ ფინალს, სადაც მისი მოწინააღმდეგე ისევ მარკო იქნება, როგორც 11 წლის წინ. მათი კარიერა სხვადასხვაგვარად განვითარდა: სანამ "ბლანკოსის" შუახაზელი ტიტულებს იგებდა, ვესტფალიელთა შემტევი დროის უმეტეს ნაწილს ლაზარეთში ატარებდა. სხვადასხვა ტრავმის გამო, "შვარცგელბენის" მე-11 ნომერმა 227 მატჩი გამოტოვა.
როისს არ უთამაშია გერმანიის ნაკრებისთვის ტრიუმფალურ 2014 წლის მსოფლიო ჩემპიონატზე. ამის გარდა, 2016-2020 წლების ევროპის ჩემპიონატებმა და ბოლო მუნდიალმაც მარკოს გარეშე ჩაიარა. ფეხბურთის ისტორიაში ის ითვლება ერთ-ერთ ყველაზე უიღბლო მოთამაშედ - გარდა ტრავმიანობისა, მის კარიერაში იწერება წაგებული ფინალი და ბოლო წუთზე დაკარგული ჩემპიონობა.
როგორც ვხედავთ, დორტმუნდის შემტევი ამ მხრივ რეალის მერვე ნომრის სრული ანტიპოდია. მათ ურთიერთშეხვედრების ისტორია კი ასეთია: 15 მატჩი - 7-ჯერ მოიგო კროოსმა, 4-ჯერ ბორუსიას მე-11 ნომერმა, 4 თამაშიც ფრედ დასრულდა. მოახლოებულ ფინალში კი ფავორიტებად მადრიდელები მოიაზრებიან.
როისის სასარგებლოდ იმის თქმა შეგვიძლია, რომ "სამეფო კლუბის" წინააღმდეგ გამარჯვების გამოცდილება ნამდვილად აქვს. ჩემპიონთა ლიგის 2012/2013 წლების სეზონში, ფინალში გასვლის წინ, "შვარცგელბენმა" სწორედ "ბლანკოსი" გაანადგურა. ალბათ ყველას გვახსოვს რობერტ ლევანდოვსკის პოკერი, რომელშიც გერმანელმა შემტევმა 2 ასისტით თავისი წვლილიც შეიტანა.
ამის გარდა, მარკოს სხვადასხვა დროს თავად აქვს გატანილი ოთხი გოლი სანტიაგო ბერნაბეუს ბინადრებისთვის. ვნახოთ, რას იზამს ის თავის უკანასკნელ მატჩში ვესტფალიელთა მაისურით. ტონისა და დორტმუნდის შემტევს ერთად შეეძლოთ წარმატების მიღწევა, როგორც "ბუნდესნაკრებში", ისე საკლუბო დონეზეც.
ვინ იცის, კიდევ რამდენად უფრო ძლიერი იქნებოდა 2014 წლის "მანშაფტი" ბორუსიას მეთერთმეტე ნომერთან ერთად. რაც შეეხება საკლუბო კარიერას, "რეკორდმაისტერი" არაერთხელ ცდილობდა როისის გადმობირებას, ჯერ კიდევ მაშინ, როდესაც ბუნდესლიგის გრანდში ლეგენდარული გერმანელი შუახაზელი თამაშობდა.
ალემანთა ეროვნულ გუნდში მათ ერთად ჩატარებული აქვთ 31 შეხვედრა და ისიც არ უნდა დავივიწყოთ რომ, რეალის მერვე ნომერს ორი გოლი სწორედ მარკოს საგოლე გადაცემებით აქვს გატანილი. გავიხსენოთ კროოსის ლეგენდარული ჯარიმა შვედეთთან. კედელი მან სწორედ "შვარცგელბენის" შემტევთან გაათამაშა. 1 ივნისს, ისინი ერთმანეთს მეტოქეების რანგში შეხვდებიან.
