კარლო ანჩელოტი მადრიდის რეალის დატოვების შემდეგ, ბრაზილიის ნაკრებს ჩაიბარებს. არსებობს მოსაზრება, რომ ის იქნება პირველი უცხოელი სპეციალისტი "სელესაოში", მაგრამ ეს ვერსია მცდარია. სამხრეთ ამერიკული გრანდის ისტორიაში გვხვდება 3 უცხოელი დამრიგებელი, რომელსაც "პენტაკამპეონეში" უმუშავია.
პირველი იყო ურუგვაელი რამონ პლატერო, რომელიც ჟოაკიმ გიმარაეშთან ერთად, ბრაზილიის ნაკრებს 1925 წელს წვრთნიდა. საინტერესოა, რომ აღნიშნულმა დუეტმა "სელესაო" კოპა ამერიკას ფინალამდე მიიყვანა. მეორე შემთხვევა გვხვდება 1944 წელს, როდესაც პორტუგალიელმა ჟორეკა დე ლიმამ "კანარინიო" ფლავიო კოსტასთან ერთად ჩაიბარა.
ამ დუეტმა ბრაზილიის ნაკრებს მოუტანა ორიდან ორი გამარჯვება, რის შემდეგაც ეროვნულ გუნდში მუშაობა კოსტამ დამოუკიდებლად გააგრძელა. ბოლოს კი მესამე შემთხვევა, არგენტინელი ფილპო ნუნიესი, რომელიც "სელესაოში" მუშაობდა დამოუკიდებლად, მეწყვილის გარეშე, 1965 წელს.
ნუნიესის მწვრთნელობით "კანარინიომ" ჩაატარა მხოლოდ ერთი მატჩი, განადგურებული იქნა ურუგვაის ნაკრები, ანგარიშით 3:0. რაც შეეხება არგენტინელი დამრიგებლის დათხოვნის მიზეზს, მას გაუწყვიტეს კონტრაქტი იმის გამო, რომ მან ვერ შეძლო თავის გუნდში დისციპლინარული პრობლემების მოგვარება.
უცხოელი მწვრთნელები ბრაზილიის ნაკრებში
| მწვრთნელი | ეროვნება | პერიოდი | შედეგი |
| რამონ პლატერო | ურუგვაი | 1925 | 2 მოგება, 1 ფრე, 1 წაგება |
| ჟორეკა დე ლიმა | პორტუგალია | 1944 | 2 მოგება |
| ფილპო ნუნიესი | არგენტინა | 1965 | 1 მოგება |
