პირველად ისტორიაში - უზბეკეთის ნაკრები მსოფლიო ჩემპიონატზე გავიდა. აღნიშნული ქვეყნის ეროვნულ გუნდს აზიის საკვალიფიკაციო რაუნდის ჯგუფური ეტაპის ბოლო ტურში სჭირდებოდა მხოლოდ ფრე და "თეთრ-ლურჯებმა" ამ შედეგს მიაღწიეს. გავიხსენოთ, თუ რა გზა გაიარეს "თურანელებმა".
იყო დრო, როდესაც უზბეკეთი ფიგურირებდა ფიფას რეიტინგის 100-ეულს მიღმა, 2000 - 2011 წლებში კი ამ ნაკრებმა მინიმუმ ხუთგოლიანი სხვაობით სამჯერ წააგო. დღეს, "თეთრ-ლურჯები" მსოფლიოს 60 საუკეთესო ეროვნულ გუნდს შორის არიან, თანაც მუნდიალის საგზურით თავიანთ აქტივში.
"თურანელების" პროგრესი კარგად არის ასახული შემადგენლობაზეც, ნაკრების ორი ფეხბურთელი თამაშობს ევროპის ტოპ ხუთ ლიგაში - აბდუკოდირ ხუსანოვი მანჩესტერ სიტიში, ელდორ შომუროდოვი კი რომაში. მათ გარდა, ევროპული კლუბები სხვა უზბეკი მოთამაშეებითაც ინტერესდებიან.
"თეთრ-ლურჯების" წარმატება წარმოუდგენელია თემურ კაპაძის გარეშე. ფერგანაში დაბადებულმა წარმოშობით მესხმა მთელი თავისი კარიერა სწორედ აღნიშნული ქვეყნის ფეხბურთს დაუთმო. საფეხბურთო კარიერის საუკეთესო წლები ყოფილმა უზბეკმა შუახაზელმა გაატარა ტაშკენტის ფახთაქორში, რომლის რიგებში 150-ზე მეტი მატჩი ჩაატარა.
საფეხბურთო კარიერის დასრულების შემდეგ, "მებამბეების" ყოფილი ნახევარმცველი აქტიურად მუშაობდა "თურანელების" ახალგაზრდულსა და ოლიმპიურ ეროვნულ გუნდებში. რაც შეეხება 43 წლის ყოფილი შუახაზელის საერთაშორისო კარიერას: 119 მატჩი (რეკორდული მაჩვენებელი სერვერ ჯეფაროვის გამოჩენამდე) და 10 ბურთი.
უზბეკეთის მსოფლიო ჩემპიონატზე სწორედ კაპაძემ გაიყვანა. 2018 წლის პირველ ნახევარში ის უკვე მუშაობდა ნაკრებში, თუმცა დროებით, ექტორ რაულ კუპერის დანიშნვამდე. 7 წლის შემდეგ, წარმოშობით მესხმა სპეციალისტმა "თეთრ-ლურჯები" ჩაიბარა სრულფასოვნად და შედეგიც სახეზეა, ამ ქვეყნის ეროვნული გუნდი მუნდიალზეა.
